मुंबई : बनावट तिकीट तयार करून विमानतळावर प्रवेश करणाऱ्या व्यक्तीला मुंबई आंतरराष्ट्रीय विमानतळावरून अटक करण्यात आली आहे. ही घटना १४ मे रोजी घडली असून नूर शेख असं अटक केलेल्या व्यक्तीचं नाव आहे. मागच्या प्रवासात हरवलेल्या फोनची माहिती घेण्यासाठी हा खटाटोप केल्याचं शेख याने सुरक्षा दलाला सांगितलं आहे.

अधिक माहितीनुसार, १४ मे रोजी रात्री दहा वाजता हा व्यक्ती विमानतळाच्या मेन गेटवर आला आणि केंद्रीय औद्योगिक सुरक्षा दलाला (CISF) बनावट तिकीट दाखवून आत प्रवेश केला. पुढे तिकीट काऊंटरवर गेल्यानंतर हे तिकीट बनावट असल्याचं कर्मचाऱ्यांच्या लक्षात आलं. त्यानंतर काऊंटरवरील कर्मचाऱ्यांनी CISF च्या जवानांना ही माहिती दिली.

केंद्रीय औद्योगिक सुरक्षा दलाला ही माहिती मिळताच त्यांनी सदर व्यक्तीला अटक केली. दरम्यान, शेख याची नोकरी गेल्यानंतर तो असे काम करू लागला, त्याच्या मानसिकतेवर परिणाम झाला असून मागच्या आठवड्यात दिल्ली ते मुंबई प्रवास करत असताना त्याचा मोबाईल हरवला होता असं शेख याच्या कुटुंबियांनी सांगितलं.

आपण बनावट तिकीट काढून विमानतळाच्या कार्यालयात जाऊन सीसीटीव्ही चेक करावेत या हेतून मी कृत्य केल्याचं आरोपी शेख याने पोलिसांना सांगितलं आहे.

आरोपीला सहर पोलिसांच्या ताब्यात दिलं आहे. तर त्याच्याविरोधात आयपीसी कलम ४२०, ४६५ आणि ४६८ अंतर्गत गुन्हा दाखल करण्यात आला असून त्याला न्यायालयीन कोठडी सुनावण्यात आली आहे. अधिकचा तपास सुरू असल्याची माहिती पोलिसांनी दिली आहे.