Mumbai Airport : सव्वा कोटी रुपयांच्या सोन्याच्या तस्करीप्रकरणी सीमा शुल्क विभागाने मुंबई विमानतळावरून दोघांना अटक केली. आरोपींमध्ये एका महिलेचा समावेश आहे. जलालुद्दीन व संजिता बेगम अशी आरोपींची नावे असून दोघेही चेन्नईतील रहिवासी आहेत.

सोने लपवलेले एक पार्सल आरोपींच्या साथीदाराने आंतरराष्ट्रीय विमानतळावरून देशांतर्गत विमानतळ परिसरात फेकले होते. साथीदाराने ठरलेल्या ठिकाणी टाकलेले पार्सल घेण्यासाठी दोघे आरोपी आले असता सीआयएसएफ सुरक्षा दलाच्या जवानांनी त्यांना ताब्यात घेतले.

आरोपींच्या साथीदाराने १२ सप्टेंबर रोजी विमानतळ परिसरात सोन्याचे पार्सल फेकले होते. त्यात मेणामध्ये सोन्याची भुकटी लपवण्यात आली होती. अशा सहा मेणबत्त्या त्या पुड्यात सापडल्या होत्या. त्यात २५३४ ग्रॅम सोन्याची भुकटी सापडली.

सोन्याची किंमत बाजारात सव्वा कोटी रुपये आहे. १३ सप्टेंबर रोजी आरोपी सोने नेण्यासाठी आले असता त्यांना सुरक्षा रक्षकांकडून ताब्यात घेण्यात आले. त्यांच्या झडतीत त्यांचाकडे सोने सापडले. आरोपी सोने मुंबई विमानतळावरून तमिळनाडूमध्ये नेणार होते.

आरोपींच्या चौकशीत त्यांना एका अज्ञात व्यक्तीचा कॉल आला होता आणि त्याने त्यांना सोने आणण्यासाठी सांगितले होते असे आढळले आहे. सोन्याच्या तस्करीसाठी पैसे मिळणार होते; पण त्यापूर्वीच त्यांना विमानतळावर पकडण्यात आले.

दोन्ही आरोपींविरोधात सीमा शुल्क कायद्यांतर्गत गुन्हा दाखल करून त्यांना अटक करण्यात आली आहे. सर्व प्रकरणामागे आंतरराष्ट्रीय टोळी असल्याचा संशय असून सीमाशुल्क विभाग त्याबाबत तपास करत आहे.