मुंबई - राज्यातील पक्ष संघटन मजबूत करण्यासाठी उपमुख्यमंत्री अजित पवार हे दिवाळी नंतर राज्यव्यापी दौरा करणार असल्याची माहिती राष्ट्रवादी काँग्रेसचे (अजित पवार गट) प्रदेशाध्यक्ष सुनील तटकरे यांनी शनिवारी येथे दिली. यातून अजित पवार यांच्या नेतृत्वाखाली राष्ट्रवादी काँग्रेसचे एक बळकट संघटन उभे राहील, असा विश्वासही त्यांनी व्यक्त केला.

राष्ट्रवादी काँग्रेसच्या राज्यभरातील विविध ३० आघाडीच्या प्रमुखांची बैठक आज झाली.

या बैठकीनंतर प्रसारमाध्यमांच्या प्रतिनिधींशी बोलताना तटकरे यांनी अजित पवार यांच्या दौऱ्याची माहिती दिली. आगामी निवडणुका आणि राजकीय घडामोडी तसेच अजित पवारांच्या नेतृत्वाखाली घेतलेली भूमिका यावर बैठकीत सखोल चर्चा करण्यात आल्याचेही त्यांनी सांगितले

आमचे दौरे लवकरच सुरू होतील. संघटना मजबूत करण्यासाठी तालुकास्तरापासून ते राज्यस्तरापर्यंत विविध विभागांच्या माध्यमातून आम्ही प्रयत्न करत आहोत. विशेष करून महिला आणि युवकांचे काम अत्यंत उत्तम सुरू असल्याचे तटकरे म्हणाले.