मुंबई - मुंबई पोलिसांनी बुधवारी महिलांद्वारे चालवल्या जाणार्‍या एका हायप्रोफाईल सेक्स रॅकेटचा पर्दाफाश केला आहे. अंधेरी पश्चिम भागातील उच्च भ्रु परिसरात सेक्स रॅकेट चालवले जात होते. बुधवारी पोलिसांनी या प्रकरणी कारवाई करत दोन ज्येष्ठ नागरिकांसह तीन महिलांना अटक केली आहे. गुप्त बातमीदारांकडून वेश्याव्यवसायाच्या रॅकेटची माहिती मिळाल्यानंतर मुंबई पोलिसांच्या समाजसेवा शाखेने 5 एप्रिल रोजी रात्री कारवाई करत रॅकेटचा पर्दाफाश केला.

पोलिसाना मिळालेल्या माहितीनुसार सुरुवातीला तीन संशयितांपैकी एक महिला आरोपी ज्योतिषी असल्याचा दावा करत अवैध देहव्यापारात व्यापारात गुंतलेली असल्याची माहिती पोलिसांना मिळाली होती. या माहितीवर मुंबई पोलिसांनी सखोल काम केले आणि ५ एप्रिलच्या रात्री सापळा रचला. अंधेरी पश्चिम येथील शास्त्रीनगर भागातील एका इमारतीच्या चौथ्या मजल्यावरील फ्लॅट क्रमांक 405 वर छापा टाकून 65, 64 वयोगटातील दोन ज्येष्ठ नागरिक आणि 31 वर्षीय महिलेसह तीन महिलांना ताब्यात घेतले.

पोलिस पथकाने केलेल्या तपासात असे आढळून आले की, तीन आरोपी महिलांपैकी एक महिला स्वत:ची ओळख ज्योतिषी म्हणून सांगायची. ती अंधेरी पश्चिमेच्या एका उचब्रू परिसरात इमारतीत वास्तव्यास होती. महिलांचा देह व्यापारासाठी वापर करून स्वत:च्या आर्थिक फायद्यासाठी या अवैध व्यवसायात संशयित आरोपी महिला सहभागी असल्याचेही अधिकाऱ्यांना आढळून आले आहे. या प्रकरणातील तीन महिलांना अटक केल्याने, या रॅकेटमध्ये वापरल्या जाणाऱ्या तीन महिलांची सुटका करण्यात अधिकाऱ्यांना यश आले, असे एका अधिकाऱ्याने सांगितले.