Mumbai - डोंबिवली भाजपचे पदाधिकारी नंदू जोशी यांच्यावर विनयभंगाचा गुन्हा दाखल झाला आहे. नंदू यांच्यावर पोलिसांनी खोटा गुन्हा दाखल केल्याचा आरोप करत भाजपने मानपाडाचे वरिष्ठ पोलिस निरिक्षक शेखर बागडे यांच्या बदलीची मागणी केली आहे. बागडे यांची बदली न होता त्यांना सक्तीच्या रजेवर पाठविण्यात आल्याने भाजपचा रोष वाढताना दिसत आहे.

भाजपच्या पदाधिकाऱ्यांनी बागडे यांची बेहिशोबी मालमत्ता आहे. एवढी संपत्ती एका वरिष्ठ पोलिस निरिक्षकाकडे कोठून आली ? असा आरोप पत्रकार परिषदेत केला. ही मालमत्ता त्यांनी कशी कमविली याची चौकशी व्हावी यासाठी ईडी, सीबीआय संबंधित खात्याकडे मागणी करणार आहोत. त्याविषयी कागदपत्र देखील सादर करणार असल्याचे प्रदेश सचिव गुलाबराव करुंजुले यांनी सांगितले.

भारतीय जनता पार्टीच्या वतीने रविवारी डोंबिवलीत पत्रकार परिषद घेण्यात आली. या पत्रकार परिषदेस भाजपचे प्रदेश सचिव गुलाबराव करंजुले, माजी आमदार नरेंद्र पवार, कल्याण जिल्हाध्यक्ष शशिकांत कांबळे, माजी उपमहापौर राहुल दामले, नंदू परब आदि पदाधिकारी उपस्थित होते.

भाजपाने पत्रकार परिषद घेत वरिष्ठ पोलिस निरिक्षक शेखर बागडे यांची बेहिशोबी मालमत्ता असल्याची माहिती दिली. या मालमत्तेची कागदपत्रे ईडी, सीबीआय संबंधित विभागाकडे पाठविली जाणार असून याची चौकशी व्हावी अशी मागणी करणार असल्याचे सांगितले. एका वरिष्ठ पोलिस निरिक्षकाकडे एवढी मालमत्ता कशी येते याची माहिती मिळाली पाहीजे.

त्यासाठी या मालमत्ते संदर्भात ईडी, सीबीआयची चौकशी झाली पाहीजे अशी आमची मागणी आहे. मानपाडा पोलिस ठाण्याचे वरिष्ठ भाजप पदाधिकाऱ्यांना अयोग्य वागणूक देत आहेत. याविषयी वारंवार पोलिस खात्याच्या वरिष्ठांकडे तक्रार केली मात्र तक्रारींची दखल घेतली जात नसल्याचे प्रदेश सचिव करंजुले यांनी सांगितले. हे पहाता कल्याण लोकसभा मतदार संघातील भाजपा आणि शिवसेना शिंदे गट यांच्यातील वाद काही शमण्याचे नाव घेत नाही.

राजकीय वरदहस्तामुळे भाजपा पदाधिकाऱ्यावर गुन्हा दाखल झाल्याचा आरोप करत भाजपा पदाधिकाऱ्यांनी वरिष्ठ पोलिस निरिक्षक शेखर बागडे यांच्या बदलीची मागणी केली. त्यांची बदली होत नसल्याने कल्याण येथे भाजपा पदाधिकारी, कार्यकर्ते यांनी आक्रमक होत सार्वजनिक बांधकाम मंत्री रविंद्र चव्हाण यांच्या उपस्थितीत एक बैठक घेतली.

यामध्ये बागडे यांची बदली होत नाही तोपर्यंत शिवसेनेच्या सर्व कार्यक्रमांवर बहिष्कार टाकण्याचे तसेच शिंदे गटास सहकार्य न करण्याचा ठराव मांडला. यानंतर खासदार डॉ. श्रीकांत शिंदे हे कमालीचे नाराज झाले असून त्यांनी भाजपा शिवसेना युतीसाठी खासदार पदाचा राजीनामा देण्याची तयारी दाखविली.

भाजप प्रदेश अध्यक्ष चंद्रशेखर बावनकुळे यांच्या स्पष्टीकरणानंतर हा वाद शमेल असे वाटत असतानाच ठाणे येथे पार पडलेल्या भाजपच्या मेळाव्यात भाजपा आमदार संजय केळकर यांनी ठाणे व कल्याण लोकसभा मतदार संघ हे आपले होते, यापुढेही राहतील असे म्हणत स्थानिक पातळीवरील कार्यकर्ते, पदाधिकारी यांची भावना बोलून दाखविली आहे. त्यातच डोंबिवलीतील भाजप कार्यकर्ते हे बागडे यांच्या बदलीवरुन आक्रमक पवित्रा घेत असून आता हा वाद पुढे कोणते वळण घेतो हे पहावे लागेल.