मुंबई : उद्या शुक्रवार 17 सप्टेंबर 2021 रोजी मुंबईतील (mumbai) सर्व शासकीय आणि महानगरपालिका लसीकरण केंद्रांवर (bmc vaccination center) फक्त महिलांसाठी राखीव असे विशेष कोविड 19 लसीकरण सत्र भरवण्यात येणार आहे. महिलांच्या लसीकरणाचे (women's corona vaccination) प्रमाण वाढावे यासाठी महापालिका विशेष मोहिम आयोजित (Special Campaign) करुन शुक्रवारी सकाळी 10.30 ते सायंकाळी 6.30 पर्यंत लसीकरण होणार आहे.

थेट लसीकरण केंद्रावर येवून महिलांना  पहिला आणि दुसरा डोस घेता येणार आहे. फक्त महिलांना लस दिली जाणार असल्याने ऑनलाइन पूर्व नोंदणी बंद राहणार असल्याचे ही पालिकेकडून स्पष्ट करण्यात आले आहे. कोविड-19 विषाणू प्रतिबंधक लसीकरण अधिकाधिक वेगाने आणि सर्व स्तरातील नागरिकांपर्यंत नेण्यासाठी मुंबई महानगरपालिका देखील प्रयत्नशील आहे. त्यासाठी विशेष सत्र राबवण्यात येत आहेत. याचाच एक भाग म्हणून फक्त महिलांसाठी राखीव असे विशेष कोविड लसीकरण सत्र उद्या शुक्रवारी राबवले जाणार आहे.

मुंबईतील सर्व 227 निर्वाचन प्रभागांमधील लसीकरण केंद्र आणि त्यासोबत सर्व शासकीय व महानगरपालिका रुग्णालये आणि कोविड सेंटर येथील लसीकरण केंद्रावर थेट येवून (वॉक इन) महिलांना कोविड लस घेता येणार आहे. पहिली किंवा दुसरी मात्रा देखील ह्या सत्रात दिली जाणार आहे. फक्त महिलांना लस दिली जाणार असल्या कारणाने, उद्या साठीची प्रचलित ऑनलाइन पूर्व नोंदणी बंद ठेवण्यात आली आहे.