उल्हासनगर - उल्हासनगर मधील आशेळेपाडा परिसरात राहणारे नंदकुमार ननावरे यांनी आपल्या पत्नीसह गच्चीवरून उडी मारून आत्महत्या केल्याची धक्कादायक घटना घडली आहे. ननावरे यांनी माजी आमदार पप्पू कलानी व ज्योती कलानी यांचे स्वीयसहायक म्हणून काम पाहिले होते. सध्या ते कलानी कुटुंबाचे ते मंत्रालयातील कामे पाहत होते.

ननावरे यांनी अचानक हे टोकाचे पाऊल का उचलले याविषयी अद्याप माहिती मिळालेली नाही. मात्र या घटनेमुळे परिसरात हळहळ व्यक्त केली जात आहे. मिळालेल्या माहितीनुसार, नंदकुमार ननावरे हे आपल्या परिवारासह उल्हासनगर कॅम्प नंबर 4 येथील आशेळेपाडा परिसरात राहत होते.

मंगळवारी दुपारी त्यांनी पत्नी उर्मिला हिच्यासह राहत्या बंगल्याच्या गच्चीवरून उडी मारून आत्महत्या केली. पोलिसांनी घटनास्थळाचा पंचनामा करून दोघांचे मृतदेह शवविच्छेदनासाठी उल्हासनगरच्या शासकीय रुग्णालयात पाठविले आहेत. या घटनेनंतर आशेळेपाडा परिसरात शोककळा पसरली आहे. ननावरे दांपत्याने आत्महत्या का केली याचे कारण अद्याप देखील समजले नसून पोलिसांनी घटनेचा तपास सुरु केला आहे.

कॅम्प नं-४, आशेळेगाव नागराणी मंदिर मागे नंदू ननावरे हे पत्नी आणि मुला मुलीसह तीन मजल्याच्या घरात राहत होता. ननावरे यांनी माजी आमदार पप्पू कलानी व ज्योती कलानी यांचे स्वीयसहायक म्हणून काम केले असून आजच्या स्थितीत कलानी कुटुंबाचे मंत्रालयातील कामे पाहतं होते अशी चर्चा आहे. तसेच मंत्रालयातील कामानिमित्त शिवसेना आणि शिंदे गटाचे आमदार बालाजी किणीकर यांच्याकडे जाणे येणे होते, अशीही चर्चा आता रंगू लागली आहे.