सकाळच्या गर्दीत मुंबईत ट्रेन पकडणं म्हणजे जगातील सर्वात कठीण काम. अशातच अमाप गर्दीत बसायला जागा तर सोडा, नीट उभं राहणं पण कठीण होतं. अशातच धाकाबुक्की आणि भांडणं देखील नित्याची असतात. मात्र हीच भांडणं विकोपाला गेलेली देखील पाहायला मिळाली आहेत. अशीच एक धक्कादायक घटना आज मुंबईत घडलीये.       

वादामुळे धावत्या लोकलमधून एका प्रवाशाला चक्क बाहेर  फेकण्यात आलंय. हार्बर मार्गावर लोकलमध्ये सकाळी गर्दीच्या वेळेत झालेल्या वादामुळे एका प्रवाशांला धावत्या लोकलमधून बाहेर फेकल्याची घटना आज (ता.5) सकाळी घडली.  विजय राम गुप्ता असे या प्रवाशाचे नाव असून या जखमी प्रवाशांवर सायन रुग्णालयात उपचार सुरू आहे.

आणखी वाचा : मुंबईत रेल्वे अपघाताचे दहा वर्षांत २७ हजार बळी

मानखुर्द येथे राहत असलेल्या विजय गुप्ता (35) यांने सकाळी 9 च्या सुमारास सीएसएमटीला जाणारी लोकल पकडली. लोकलला गर्दी असताना विजय आणि अज्ञात प्रवाशांमध्ये वाद झाला. वादाचे रूपांतर भांडणात झाले. अज्ञात प्रवाशाने रागाच्या भरात विजयला धावत्या लोकलमधून धक्का दिला.  या दुर्घटनेमुळे विजय गंभीर जखमी झाला असून त्याच्यावर सायन रुग्णालयात उपचार सुरू आहेत.

दरम्यान वादाचे नेमके कारण समोर आले नसले तरी गर्दीत धक्का लागल्यामुळे भांडण झाल्याची प्राथमिक शक्यता रेल्वे पोलिसांनी वर्तवली आहे. या प्रकरणी वडाळा रेल्वे पोलीसांनी अज्ञात प्रवाशाविरोधात गुन्हा नोंदवण्याची प्रक्रिया सुरू केली आहे, अशी माहिती कुर्ला रेल्वे पोलिसांनी दिली.

Webtitle : mumbai local train traveller thrown out of running train