मुंबई - राष्ट्रीय नागरी आरोग्य अभियानांतर्गत आरोग्य क्षेत्रात आरोग्य सुविधा सक्षमीकरणासाठी मुंबईत सुमारे ५ हजार ५७५ 'आशा' आरोग्य सेविकांची कंत्राटी तत्त्वावर नेमण्यात येणार आहेत.

दर्जेदार आरोग्य सुविधा पुरविण्यावर पालिकेने भर दिला आहे. मुंबईकर नागरिकांना त्यांच्या घरानजीक आणि सहजपणे आरोग्य सेवा मिळावी म्हणून राज्याचे मुख्यमंत्री एकनाथ शिंदे यांच्या संकल्पनेतून पालिकेने हिंदुहृदयसम्राट बाळासाहेब ठाकरे आपला दवाखाना उपक्रम सुरु केला आहे. त्याला चांगला प्रतिसाद मिळत असल्याची माहिती पालिका प्रशासनाने दिली. आता वस्ती पातळीवर गृहभेटीद्वारे राबवावयाच्या आरोग्य सेवांचे सक्षमीकरण करण्यात येत आहे.

याचाच एक भाग म्हणून महानगरपालिका आयुक्त तथा प्रशासक इकबाल सिंह चहल यांच्या निर्देशानुसार, सार्वजनिक आरोग्य खात्याच्या माध्यमातून संपूर्ण मुंबई महानगरासाठी एकूण ५ हजार ५७५ आशा आरोग्य सेविकांची कंत्राटी व मोबदला तत्वावर नेमणूक करण्याचा निर्णय घेण्यात आला आहे. या कामासाठी इच्छुक उमेदवारांकडून महानगरपालिकेने अर्ज मागविले आहेत. आशा सेविकांना दरमहा सहा हजार रूपयांपर्यंत कामावर आधारित मानधन दिले जाणार आहे.

आरोग्य विषयक कामकाजांसाठी राष्ट्रीय निकषांप्रमाणे सेविकांची आवश्यकता आहे. सद्या सुमारे १ हजार ८८ आशा सेविका, तर २ हजार ८०० आरोग्य सेविका कार्यरत आहेत. त्यामुळे आता आरोग्य खात्याची गरज लक्षात घेता, आरोग्य केंद्रात १ हजार ते १२०० लोकसंख्येसाठी व सुमारे २५० घरांसाठी एक अशा पद्धतीने या आशा स्वयंसेविकांची नेमणूक करण्यात येणार आहे.

असे असेल कामाचे स्वरूप

आशा सेविकांना प्रामुख्याने वस्ती पातळीवर गृहभेटी देऊन सर्वेक्षण करण्याची जबाबदारी असेल. तसेच नागरिकांमध्ये असलेले विविध आजारांचे रूग्ण, गरोदर माता व बालकांचे लसीकरण, कुटुंब नियोजन, संसर्गजन्य व असंसर्गजन्य आजारांबाबत प्रबोधनाची तसेच उपाययोजनांचीही जबाबदारी असणार आहे, असे प्रशासनाकडून सांगण्यात आले.