मुंबई - मुंबई विद्यापीठातील अधिसभा व अभ्यास मंडळाच्या रखडलेल्या निवडणूक प्रक्रियेला अखेर सुरुवात झाली आहे. गुरुवारी सायंकाळी विद्यापीठ प्रशासनाशी झालेल्या बैठकीत याबाबत निर्णय झाला. शनिवारी (ता. 2) याबाबतच्या सूचना मुंबई विद्यापीठ प्रशासन जाहीर करील. अधिसभेच्या (सिनेट) निवडणुका जानेवारीत होणार आहेत.

महाराष्ट्र सार्वजनिक विद्यापीठ कायदा न झाल्याने दोन वर्षांपासून सिनेटच्या निवडणुका रखडल्या आहेत. विद्यापीठातील निकालांच्या दिरंगाईचा फटकाही या निवडणुकांना बसला. विद्यापीठावर बहुतांश सदस्य प्रभारी असल्याने या निवडणुकांबाबत निर्णय होत नसल्याबद्दल विद्यार्थी संघटनांनी नाराजी व्यक्त केली होती. मात्र प्र-कुलगुरूपदावर एसएनडीटी विद्यापीठाचे प्र-कुलगुरू डॉ. विष्णू मगरे यांची नियुक्ती होताच सिनेट निवडणुकीच्या हालचालींना वेग आला आहे.

शनिवारी अधिसभेवर प्राचार्य, व्यवस्थापन प्रतिनिधी, विद्यापीठ अध्यापक अशा तीन घटकांच्या व अभ्यास मंडळासाठी महाविद्यालयातील विभागप्रमुखांच्या निवडणुकीसाठी तात्पुरत्या स्वरूपातील मतदार यादी विद्यापीठाच्या संकेतस्थळावर प्रसिद्ध केली जाणार आहे. या यादीबाबत काही सूचना व बदल सुचवायचे असल्यास आवश्‍यक कागदपत्रांसह सहायक कुलसचिवांना 6 डिसेंबरपर्यंत कळवावे, असे आवाहन प्रभारी कुलगुरू डॉ. देवानंद शिंदे यांनी केले आहे.

या निवडणुका दोन टप्प्यांत घेतल्या जाणार आहेत. पहिल्या टप्प्यात प्राचार्य, व्यवस्थापन प्रतिनिधी, विद्यापीठ अध्यापक व अभ्यास मंडळासाठी महाविद्यालयीन विभागप्रमुख अशा चार घटकांच्या प्रतिनिधींच्या निवडणुका घेतल्या जातील. दुसऱ्या टप्प्यात शिक्षक व नोंदणीकृत पदवीधर घटकांच्या निवडणुका होतील.

निवडणुकीचा कार्यक्रम -
तपशील .... अंतिम तारीख
तात्पुरती मतदार यादी - 2 डिसेंबर
आक्षेप - 6 डिसेंबर, सायंकाळी 5 पर्यंत
दुरुस्त मतदार यादी - 9 डिसेंबर
कुलगुरूंकडे अपील - 13 डिसेंबर, सायं. 5 पर्यंत

घटक ........ जागा
प्राचार्य - 10
संस्था प्रतिनिधी - 6
विद्यापीठ अध्यापक - 3
महाविद्यालयांतील विभागप्रमुख - 3
एकूण जागा- 22