डोंबिवली - एक्सप्रेस मधील प्रवाशांची तक्रार आल्याने आरपीएफ चे जवान दिलीप सोनवणे हे सोडवण्यासाठी गेले. तक्रारीचे निवारण झाले आणि तेवढ्यात गाडी सुरू झाली. चालत्या गाडीतून उतरण्याच्या नादात त्यांचा तोल गेला आणि ट्रेन खाली सापडून त्यांचा दुर्दैवी मृत्यू झाला आहे.कसारा स्थानकात ही घटना घडली असून दिलीप हे कल्याण येथे राहण्यास होते.

रेल्वे आरपीएफ मध्ये दिलीप सोनवणे हे नोकरीस होते. कल्याण मध्ये ते राहण्यास होते. शनिवारी रात्री ते कसारा रेल्वे स्थानकात रात्रपाळी मध्ये कार्यरत होते. सकाळी 7 च्या सुमारास एलटीटी-कानपूर एक्स्प्रेसमधील प्रवाशांनी त्यांना मदतीसाठी हाक मारली.

तक्रारीचे निवारण करण्यासाठी दिलीप रेल्वेत चढले. तक्रारीचे निवारण झाले आणि थोड्या वेळात गाडी सुरू झाली. चालत्या ट्रेनमधून त्यांनी उतरण्याचा प्रयत्न केला. मात्र त्यांचा तोल गेल्याने ते गाडी खाली सापडले. या अपघातात दिलीप यांचा मृत्यू झाला आहे. ही सर्व घटना सीसीटीव्ही मध्ये कैद झाली आहे. आरपीएफचे जवान दिलीप सोनवणे हे कुटुंबासह कल्याणमध्ये राहत होते. त्यांना दोन मुले आणि एक मुलगी आहे.