Navi mumbai Accident News : भरधाव ट्रकने रिक्षाला समोरून धडक दिल्याने झालेल्या अपघातात रिक्षाचालकाचा मृत्यू झाला असून एक जण जखमी झाल्याची घटना बुधवारी (ता. ६) रात्री तळोजा एमआयडीसी रोडवर घडली. या अपघातानंतर ट्रकचालक घटनास्थळावरून पळून गेला असून पोलिसांनी त्याच्याविरोधात गुन्हा दाखल करून त्याचा शोध सुरू केला आहे

उमेश आत्माराम पाटील (वय ३६) असे मृत रिक्षाचालकाचे नाव असून तो पनवेल तालुक्यातील वलप गाव येथे राहत होता. गत ६ सप्टेंबर रोजी दुपारी ३ वाजता उमेश हा तळोजा येथील धरणा गावात राहणाऱ्या राजू पाटील या नातेवाईकाच्या घरी गेला होता. रात्री सव्वानऊ वाजण्याच्या सुमारास दोघेही वलप-वावंजे रोडने रिक्षाने धारणगाव येथे जात असताना त्यांची रिक्षा एमआयडीसी रोडवरील एस. एस. पाटील कॉन्ट्रॅक्टर यांच्या कार्यालयासमोर आली.

या वेळी नावडे फाटा येथून बेलनाक्याकडे जाणाऱ्या भरधाव ट्रकने रिक्षाला समोरील बाजूस धडक दिली. त्यामुळे त्यांची रिक्षा रस्त्यावर पलटी होऊन उमेश पाटील व राजू पाटील हे दोघे जखमी होऊन रिक्षात अडकून पडले. त्या ठिकाणी जमलेल्या नागरिकांनी त्यांची रिक्षा सरळ केली. या अपघातात उमेश पाटील यांच्या डोक्याला गंभीर दुखापत झाली.

पोलिसांनी घटनास्थळी धाव घेत दोघा जखमींना रुग्णालयात दाखल केले; मात्र त्यापूर्वीच उमेश पाटील यांचा मृत्यू झाला. या अपघातानंतर ट्रकचालक पळून गेला असून तळोजा पोलिसांनी त्याच्याविरोधात गुन्हा दखल करून त्याचा शोध सुरू केला आहे.