Mumbai Ganesh Visarjan 2023 : खारघर आणि तळोजा वसाहत, तसेच परिसरातील गावांत ३७ ठिकाणी गणेश विसर्जन केले जाणार आहे. विसर्जनस्थळी पालिकेने दोनशे अधिकारी आणि कर्मचारी तैनात केले असून सोबत आरोग्य विभागाचे पथक असणार आहे.

पनवेल महापालिकेच्या खारघर अ प्रभाग कार्यालय अंतर्गत खारघर, तळोजा, नावडे आदी सिडको वसाहतीसह जवळपास तीस गावे आणि पाड्यांचा समावेश होतो. गाव आणि वसाहतींची वाढत्या लोकसंख्येचा आढाव घेऊन पालिकेने परिसरात चौदा कृत्रिम तलावांसह ३७ ठिकाणी विसर्जन घाटांची सोय केली आहे.

खारघर परिसरात घरगुती आणि सार्वजनिक मिळून जवळपास तीन हजार, तर नावडे, तळोजा आणि परिसरातील गावांतून सार्वजनिक आणि घरगुती सहा हजार गणपतींचे विसर्जन होणार आहे.

पनवेल महापालिकेत खारघर प्रभाग कार्यालय हा मोठा नोड आहे. त्यामुळे ३७ ठिकाणी गणपती विसर्जन केले जाणार असून स्वच्छता अधिकारी, कामगार तैनात असणार आहे.
-अरुण पाटील, अधीक्षक, खारघर ‘अ’प्रभाग कार्यालय