नवी मुंबई- खारघरमध्ये ज्वेलरीच्या दुकानावर फिल्मी स्टाईल दरोडा टाकण्यात आला आहे. खारघर सेक्टर 35 येथील बीएम ज्वेलर्समध्ये रात्री 10 वाजता हा दरोडा टाकण्यात आलाय. सदर दरोड्याचा व्हिडिओ सोशल मीडियावर व्हायरल होत आहे. चित्रपटात दाखवतात त्याच प्रमाणे हा दरोडा टाकण्यात आल्याचं दिसतंय.

3 दरोडेखोरांनी बंदुकीच्या धाकावर ज्वेलर्सचे दुकान लुटले आहे. ही संपूर्ण घटना CCTV मध्ये कैद झाली आहे.या भीषण घटनेमुळे नागरिकांमध्ये भीतीचे वातावरण आहे. कारण, चोरट्यांनी अगदी बिनधास्तपणे, कोणत्याही भीतीविना हा दरोडा टाकलाय. याप्रकरणी खारघर पोलिस ठाण्यात चोरट्यांविरुद्ध गुन्हा दाखल करण्यात आलाय.

फरार चोरट्यांचा शोध खारघर पोलीस घेत आहेत. दरोडेखोरांनी 2 राउंड फायर देखील केल्याची माहिती आहे. चोरटे टू-व्हीलरवर दरोडा टाकण्यासाठी आले होते. त्यांनी हेलमेट घालून बीएम ज्वेलर्स दुकानात प्रवेश केला अन् त्यानंतर बंदुकीचा धाक दाखवून दरोडा टाकला. यावेळी चोरट्यांनी दुकानात असलेले दागिने लुटले आहे. एकूण किती रुपयांचा माल त्यांनी पळवलाय हे अद्याप समजू शकलेलं नाही.

दरोडा टाकल्यानंतर ते बाहेर उभे असलेल्या आपल्या टूव्हीलरवर बसले.यावेळी काहींनी त्यांच्या पाठलाग गेला. याचवेळी त्यांनी दोन राऊंड फायरिंग केली. त्यामुळे लोकांनी त्यांचा पाठलाग करण्याचं सोडून दिलं. सदर घटना अत्यंत धक्कादायक मानली जात आहे. गुन्हेगारांना पोलिसांची भीती राहिली नाहीये काय? असा प्रश्न निर्माण होत आहे.