मुंबई :कोविड प्रतिबंधक लशीसाठी आता मुंबईत दादर फॉर्म्युला (dadar forumula) तयार होत आहे. लसीकरणासाठी (vaccination) नोंदणी करु न शकणाऱ्या नागरीकांपर्यंत महानगर पालिकेचे पथक स्वत: पोहचत आहे. त्यांची नोंदणी करुन घेऊन त्यांना लस घेण्यासाठी प्रोत्साहन दिले जात आहे. त्यासाठी आरोग्य कर्मचाऱ्यांचे पथकच तयार करण्यात आले आहे. (Now dadar forumula for vaccinaton)

मुंबईतील लॉकडाऊन मध्ये शिथीलता मिळाली आहे. तिसरी लाट रोखायची झाल्यास जास्तीत जास्त नागरिकांचे लसीकरण करणे गरजेचे आहे. मात्र,काही वेळा नागरिक लसीकरणासाठी पुढे येत नाही. तर,अनेक वेळा त्यांना नोंदणी करण्यात अडचणी येत आहे. त्यामुळे पालिकेच्या जी उत्तर विभागाने स्वत: नागरीकां पर्यंत पोहचण्याचा निर्णय घेतला आहे.‘ज्या पात्र नागरीकांनी आता पर्यंत लस घेतली नाही,त्यांची नोंदणी करुन त्यांचे लसीकरण करण्यासाठी हा प्रयत्न आहे. पालिकेचे पथक परीसरात फिरुन नागरीकांची नोंदणी करुन घेत आहे, असे जी उत्तर विभागाचे सहाय्यक आयुक्त किरण दिघावकर यांनी सांगितले.

न्यायालयानेही लसीकरण डोर टू डोर करण्याची सुचना केली होती. मात्र,असे लसीकरण शक्य नसल्याचे केंद्र सरकारने वेळोवेळी स्पष्ट केले. घर बसल्या थेट लसीकरण शक्य नसेल तरी पालिका आता नागरीकांची नोंदणी घर बसल्या करुन देत आहे.

फेरीवाल्यांचीही नोंदणी

फेरीवाल्यांचा रोज मोठ्या प्रमाणात नागरिकांशी संबंध येतो. तसेच त्यांचा वावरही गर्दीत असतो. त्यामुळे या विभाग कार्यालयामार्फत फेरीवाल्यांचीही नोंदणी करण्यात येणार आहे. तसेच रहिवांशांचीही नोंदणी केली जात आहे. अशा प्रकारे आता पर्यंत सहा हजाराच्या आसपास नागरीकांची नोंदणी करण्यात आली आहे.