मनोर: नागझरी बऱ्हाणपूर रस्त्यावरील लालोंडे गावच्या हद्दीतील चार मंदिराजवळ बुधवारी सकाळी साडे नऊ वाजताच्या सुमारास सीएनजी इंधनावरील धावत्या वॅगनार कारला आग (car fire) लागली होती. आगीत कार जळून खाक झाली आहे. प्रसंगावधान राखत चालक आणि प्रवाशी जळत्या कार मधून बाहेर पडल्याने कोणतीही जीवित हानी झाली नाही.

व्यवसायाने लेबर कॉट्रॅक्टर असलेले किराट गावातील भावेश पावडे किराट गावातून त्यांच्या मालकीच्या सीएनजी इंधनावर धावणाऱ्या वॅगनार कारने बोईसरकडे जात होते. नागझरी बऱ्हाणपूर रस्त्यावर लालोंडे गावच्या हद्दीतील चार मंदिराच्या लगत त्यांच्या कारमधुन धूर येऊ लागल्यानंतर कारने पेट घेतला.

प्रसंगावधान राखून भावेश पावडे आणि त्यांचे कुटुंबीय कार मधून बाहेर पडले,त्यानंतर आगीत कार जळून खाक झाली. रस्त्याच्या मधोमध कार जळाल्याने नागझरी बऱ्हाणपूर रस्त्यावर वाहतूक कोंडी झाली होती. जळती कार पाहण्यासाठी बघ्यांची गर्दी केली होती.