Drugs Crime News: चोरट्या मार्गाने आलेल्या अमली पदार्थांची शोधमोहीम पोलिसांकडून जोरात सुरू आहे. समुद्रकिनाऱ्यालगत असलेल्या गावांमध्ये पोलिसांची गस्त वाढवण्यात आली आहे.

पालघर जिल्ह्याच्या विविध पोलिस ठाण्यातील अधिकाऱ्यांना वेगवेगळ्या गावात जाऊन शोधमोहिमेला गती देण्याचे काम सोपवण्यात आले आहे.

काही दिवसांपूर्वी समुद्रमार्गे राज्याच्या लगत असलेल्या समुद्रात तस्करांनी मोठ्या प्रमाणात अमली पदार्थ फेकले असल्याची माहिती मिळाली होती. हा अमली पदार्थ समुद्राच्या भरतीच्या लाटेतून किनाऱ्यावर आला असून मासेमारी करणाऱ्या लोकांच्या हाती लागला आहे.

तसेच त्याची विक्रीदेखील होत असल्याची पोलिसांना माहिती मिळाली. या माहितीच्या पार्श्वभूमीवर डहाणू तालुक्यातील समुद्रकिनारी असलेल्या प्रत्येक गावामध्ये व पाड्यावरती पोलिसांची गस्त वाढवण्यात आली. तसेच संशयास्पद पदार्थ आढळून आल्यास तातडीने पोलिसांना माहिती द्यावी, असे आवाहन करण्यात येत आहे.