नवी मुंबई : मुख्यमंत्री (CM) उद्धव ठाकरे (Uddhav Thackeray) यांच्याबाबत केंद्रीय मंत्री नारायण राणे (Narayan Rane) यांनी अपशब्द काढल्याच्या निषेधार्थ नवी मुंबई (Navi Mumbai) आणि पनवेल (Panvel) परिसरात शिवसैनिकांनी निदर्शने केली. ऐरोली येथे माजी विरोधी पक्षनेते विजय चौगुले यांच्या नेतृत्वाखाली झालेल्या आंदोलनात राणे यांचा पुतळा जाळण्यात आला. पनवेलमध्ये शिवसेना (Shiv sena) शाखेसमोर माजी जिल्हाध्यक्ष बबन पाटील (Baban Patil) यांच्या उपस्थितीत राणेंचा पुतळा जाळून निषेध नोंदवण्यात आला. वाशी (Vashi) येथे शिवाजी चौकात रास्ता रोको करीत पोलिसांना (Police) गुन्हा दाखल करण्याचे निवेदन देण्यात आले आहे.

नारायण राणे यांनी उद्धव ठाकरें बाबत काढलेल्या अपशब्दाचा नवी मुंबईतील शिवसेनेची तीव्र शब्दांमध्ये निषेध व्यक्त केला. सकाळी शहरअध्यक्ष विजय माने यांच्या नेतृत्वाखाली वाशी शिवाजी चौकात आंदोलन करण्यात आले. तसेच काही वेळाकरिता शिवसैनिकांनी रास्ता रोको करीत जेलभरो आंदोलन केले. या आंदोलनात पोलिसांनी मध्यस्थी करीत आंदोलकांना रस्त्यावरून हटवले. ऐरोलीत शिवसैनिकांनी संताप व्यक्त केला. नारायण राणे यांचा पुतळा जाळून राणेंविरोधात जोरदार घोषणाबाजी केली.

राणेंविरोधात शिवसैनिकांकडून आंदोलन सुरु असताना नवी मुंबईतील दोन्ही भाजप आमदार आणि कार्यकर्त्यांनी प्रत्‍युत्तर दिले नाही. पनवेलमध्येही भाजपकडून प्रत्युत्तर न मिळाल्याने आंदोलन विकोपाला गेले नाही.