मुंबईचे माजी पोलीस आयुक्त परमबीर सिंह यांनी दाखल केलेल्या याचिकेवर सुनावणी करण्यास सर्वोच्च न्यायालयाने नकार दिला आहे. परमबीर सिंह यांनी अनिल देशमुख यांच्यावर केलेल्या आरोपांची सीबीआय चौकशी करण्याची मागणी केली होती. सर्वोच्च न्यायालयाने परमबीर सिंह यांना उच्च न्यायालयात याचिका दाखल करण्याचे निर्देश दिले आहेत. 

आज परमबीर सिंह यांनी दाखल केलेल्या याचिकेवर सर्वोच्च न्यायालयात सुनावणी झाली. मुंबईच्या माजी पोलीस आयुक्तांनी महाराष्ट्राचे गृहमंत्री अनिल देशमुख यांच्यावर अत्यंत गंभीर स्वरुपाचे आरोप केले आहेत, असे सर्वोच्च न्यायालयाने म्हटले आहे. 

सीबीआय चौकशीसाठी तुम्ही मुंबई उच्च न्यायालयात का याचिका दाखल केली नाही? असे सर्वोच्च न्यायालयाने वरिष्ठ वकिल मुकूल रोहतगी यांना विचारले. ते परमबीर सिंह यांच्यावतीन सुनावणीसाठी न्यायालयात हजर होते. 

सर्वोच्च न्यायालयाच्या निर्देशानंतर मुकूल रोहतगी यांच्यामार्फत उच्च न्यायालयात याचिका दाखल करणार असल्याचे परमबीर सिंह यांनी म्हटले आहे. गृहमंत्री अनिल देशमुख यांच्यावर आरोप केलेत, मग त्यांना पक्षकार का बनवले नाही? असा प्रश्न न्यायमुर्ती संजय किशन कौल यांच्या खंडपीठाने परमबीर सिंह यांना विचारला. 

पोलीस सुधारणांसंदर्भात दिलेल्या निकालाची अंमलबजावणी होत नाही,  हे दुर्देव आहे. ज्यावेळी गंभीर राजकीय परिस्थिती उदभवते, त्याचवेळी पोलीस सुधारणेचा विषय येतो, असे सर्वोच्च न्यायालयाने म्हटले आहे. 

एनआयएने सचिन वाझेना अटक केल्यानंतर या प्रकरणात आरोप-प्रत्यारोपाची मालिका सुरु झाली. दरम्यान राज्य सरकारने परमबीर सिंह यांची पोलीस आयुक्त पदावरुन गृहरक्षक दलात बदली केली. मुंबई पोलीस आयुक्तपदावरुन बदली करण्याच्या निर्णयाला सिंह यांनी आव्हान दिले आहे.