प्राध्यापकांनाही हवे वर्क फ्रॉम होम मुंबई, ता. ९ : मुंबईसह ठाणे, पालघर, रायगड, सिंधुदुर्ग, रत्नागिरी आदी जिल्ह्यांमध्ये कोरोना रुग्ण वाढत आहेत. मुंबई विद्यापीठ, त्यासोबतच एसएनडीटी विद्यापीठ आणि त्या अंतर्गत येणाऱ्या सर्व वरिष्ठ महाविद्यालयातील प्राध्यापक, सह प्राध्यापक, शिक्षकेतर कर्मचारी यांना ‘वर्क फ्रॉम होम'' देण्याची महाराष्ट्र युनियन ऑफ सेक्युलर टीचर्स संघटनेने मागणी केली आहे. यासाठी राज्यपालांसोबत वैद्यकीय शिक्षण आणि उच्च शिक्षण मंत्र्यांना पत्र लिहिले आहे. मुंबई आणि परिसरातील वरिष्ठ महाविद्यालयांमध्ये ऑनलाईन शिक्षणाला सुरुवात झाली आहे. त्यातच सोमवारपासून (ता. १०) नाताळच्या सुट्ट्यांनंतर अभियांत्रिकी महाविद्यालये सुरू होत आहेत. वाढत्या कोरोना रुग्णांमुळे ५० टक्के उपस्थितीची अट तातडीने रद्द करून प्राध्यापकांना ऑनलाईन शिक्षणाचे सर्व कामकाज हे वर्क फ्रॉम होमच्या माध्यमातून करण्याच्या सूचना सरकारने संबंधित विभागांना देण्याची मागणी संघटनेचे अध्यक्ष डॉ. विजय पवार यांनी केली आहे.