बैलगाडी शर्यत आयोजकांवर गुन्हा अंबरनाथमध्ये कोरोना नियमावलीचे उल्लंघन अंबरनाथ, ता. १३ (बातमीदार) : बैलगाड्यांच्या शर्यतीवेळी कोरोना नियमांचे पालन केले नसल्याच्या कारणावरून आयोजकांसह इतरांविरोधात शिवाजीनगर पोलिसांनी गुन्हा दाखल करण्यात आला आहे. अंबरनाथच्या आनंदनगर परिसरातील बोहोनोली येथे बुधवारी (ता. १२) किशोर पाटील आणि शिवा पाटील यांनी बैलगाडी स्पर्धेचे आयोजन केले होते. या शर्यती पाहण्यासाठी मोठ्या प्रमाणात गर्दी जमा झाली होती. कोरोनाच्या वाढत्या रुग्णसंख्येच्या पार्श्वभूमीवर राज्यात जमावबंदीचा आदेश लागू आहे. मात्र या ठिकाणी उपस्थित लोकांकडून कोरोना नियमावलीचे उल्लंघन करण्यात आले होते. नागरिकांच्या तोंडाला मास्क नसणे, सामाजिक अंतर न राखणे अशा नियमांचे पालन न करण्यात आल्याने मनाई आदेश भंग केल्याच्या कारणास्तव आयोजकांसह ५० जणांवर गुन्हा दाखल करण्यात आला.