भिवंडीत टेम्पोच्या धडकेत बालकाचा मृत्यू भिवंडी, ता. २० (बातमीदार) : रस्ता ओलांडत असताना टेम्पोने दिलेल्या धडकेत सायकलस्वार बालकाचा मृत्यू झाल्याची घटना भिवंडीतील कोनगावात घडली आहे. इसाक गफार शेख (१३, रा. ड्रिम कॉम्प्लेक्स, कोनगाव) असे या बालकाचे नाव आहे. पोलिसांनी याप्रकरणी गुन्हा दाखल करीत टेम्पोचालक धनराज चव्हाण याला अटक केली असून, तो मद्यपान करून गाडी चालवत असल्याचे उघड झाले आहे. इसाक हा सायकलने कोनगांव येथील यामाहा शोरूम समोरील रस्ता ओलांडत होता. त्यावेळी कल्याणहून भिवंडीच्या दिशेने जाणाऱ्या टेम्पोने (एमएच ०४ एफपी ७१८४) इसाकच्या सायकलीला धडक दिली. यात त्याचा मृत्यू झाला. स्थानिकांनी चालकास पकडून कोनगाव पोलिसांच्या स्वाधीन केले.