चेंबूर, ता. १० (बातमीदार) ः घाटकोपर-सायन मार्गावरील सिद्धार्थ कॉलनी येथील एमएमआरडीएने लाखो रुपये खर्च करून बांधलेल्या भुयारी मार्गाची दुरवस्था झाली आहे. एमएमआरडीएने या भुयारी मार्गाची दुरुस्ती लवकरात लवकर करावी, अशी मागणी नेस्ट संस्थेच्या सचिव स्वाती तपासे व विशाल गायकवाड यांनी केली आहे.
त्यांनी आपल्या निवेदनात म्हटले आहे की, घाटकोपर-सायन मार्गावर सतत अपघात होत असल्याने ते टाळण्याकरिता महाराष्ट्र राज्य रस्ते विकास महामंडळाने हा भुयारी मार्ग बनवला. २०१ लाख रुपये खर्च करून ऑक्टोबर २००१ मध्ये काम पूर्ण केले. तेव्हापासून या भुयारी मार्गाचा वापर या परिसरातील नागरिक करीत आहेत. सध्या या भुयारी मार्गाची दुरवस्था झाली आहे. मार्गावरील दिवे बंद आहेत. पायऱ्यांवरील लाद्या उखडल्या आहे. वॉचमन नाही. एक दरवाजा गंजलेला आहे, त्याला लाकडाचा आधार देण्यात आला आहे. पावसाळा जवळ आला आहे. पावसाळ्यात स्लॅबमधून पाणी गळते. गटारातील घाणीचे पाणी भुयारी मार्गात शिरते. रात्री सर्वत्र अंधार असतो. त्यामुळे त्वरित दुरुस्ती करावी.