नेरूळ, ता. २२ (बातमीदार) ः राजीव गांधी ब्रिजवरील रस्त्याचे काम करण्यात यावे, अशी मागणी मनसेकडून सातत्याने करण्यात येत होती. या मागणीला अखेर यश आले आहे. राजीव गांधी ब्रिज हा वर्दळीचा रस्ता आहे. नेरूळ पूर्व पश्चिम विभागात जोडण्यासाठी तसेच पाम बीच मार्गाला जोडण्यासाठी हा ब्रिज महत्त्वाचा आहे. येथील रस्ताचे काम आता होणार असल्याने प्रवाशांकडून समाधान व्यक्त करण्यात आले.

अनेक दिवस राजीव गांधी पुलावरील खड्डे, दुभाजक यांची दुरवस्था झालेली होती. पावसाळ्यापूर्वी रस्त्याचे काम करणे महत्त्वाचे आहे. अनेकदा खड्ड्यांमुळे येथे अपघात झालेले आहेत. त्यामुळे वाहनचालकांच्या संरक्षणाच्या दृष्टीने व अपघात होऊ नये याकरिता रस्त्याचे काम करण्यासाठीची निविदा नवी मुंबई महापालिकेने प्रसिद्ध केली आहे. लवकर निविदा प्रक्रिया पूर्ण करून राजीव गांधी ब्रिजवरील रस्त्याचे काम सुरू होईल. तसेच मनसेचे शहर सहसचिव अभिजीत देसाई यांच्या मागणीनुसार ब्रिजवर नॉइस बॅरिकेट लावण्यासाठीचा प्रस्तावसुद्धा विचाराधीन असल्याचे महापालिकेच्या अधिकाऱ्यांनी सांगितले आहे.