मुरबाड, ता. २२ (बातमीदार) : तालुका कृषी उत्पन्न बाजार समितीची निवडणूक अत्यंत चुरशीची होणार असल्याची चिन्हे दिसत आहेत. मागील निवडणुकीत संचालक मंडळावर माजी आमदार गोटीराम पवार यांच्या समर्थकांनी बहुमत मिळवले होते. त्यांना टक्कर देण्यासाठी विद्यमान आमदार किसन कथोरे यांचे समर्थकांनी अर्ज दाखल केले आहेत. त्यामुळे बाजार समितीच्या निवडणुकीत या दोन्ही पक्षांत जोरदार चुरस होण्याची शक्यता व्यक्त केली जात आहे.

तालुका कृषी उत्पन्न बाजार समितीच्या निवडणुकीत १७ जागांसाठी ३९ उमेदवार रिंगणात आहेत. या निवडणुकीसाठी एकूण १०८ अर्ज दाखल झाले होते. त्यापैकी ६८ उमेदवारांनी अर्ज मागे घेतले. हमाल व तोलाई या गटात दोनपैकी एका उमेदवाराने माघार घेतल्याने जयराम देसले बिनविरोध निवडून आले आहेत. कृषी, पत व बहुउद्देशीय संस्था प्रतिनिधी मतदारसंघ एकूण जागा ११ आहेत. त्यामधील सर्वसाधारण सात जागांसाठी १६ उमेदवारी अर्ज व ग्रामपंचायत मतदारसंघातील सर्वसाधारण दोन जागांसाठी सात अर्ज उरले आहेत. उर्वरित सर्व आठ जागांसाठी सरळ लढत होणार आहे.