वाशी, ता. १० (बातमीदार)ः वाढत्या उष्णतेमुळे फळांबरोबर लिंबू सरबताला मागणी वाढली आहे. अशातच बाजारात लिंबाची आवक कमी झाल्याने किरकोळ बाजारात एका लिंबासाठी सहा रुपये मोजण्याची वेळ ग्राहकांवर आली आहे.
मुंबई कृषी उत्पन्न बाजार समितीमधील घाऊक भाजीपाला बाजारात आंध्र प्रदेश, नगरमधून मोठ्या प्रमाणात लिंबू येतात. यापूर्वी बाजारात आठ ते दहा गाड्यांची आवक नियमितपणे होत होती. मात्र, सध्या पाच ते सहा गाड्यांची आवक होत आहे. त्यामुळे लिंबांना असलेली मागणी पूर्ण करता येत नाही, अशी स्थिती आहे. मे महिना संपेपर्यंत तरी हेच चित्र बाजारात असणार आहे. त्यामुळे लिंबू खरेदी करताना एक किंवा दोन लिंबू घेऊनच समाधान मानावे लागते.
-----------------------------------
लिंबाचे अनेक फायदे आहेत. त्यामुळे शाकाहारी किंवा मांसाहारी जेवणात लिंबू लागतेच. त्याची मागणी वर्षभर असते. मात्र, उन्हाळ्यात लिंबू पाणी पिणाऱ्यांचे प्रमाण वाढल्याने मागणी अधिक वाढते. उन्हाळा संपेपर्यंत तरी लिंबांचे दर असेच चढे राहतील.
- दत्तात्रय रोडे, लिंबाचे व्यापारी