सकाळ वृत्तसेवा
मुंबई, ता. ७ : राहुल गांधी हे देशातील लोकशाही टिकवण्यासाठी आणि संविधान वाचविण्यासाठी लढा देत आहेत. त्यांना पाठिंबा देण्यासाठी आणि मोदी सरकारविरोधात मुंबई काँग्रेसने आंदोलन केले. मुंबई काँग्रेस अध्यक्षा वर्षा गायकवाड यांच्या नेतृत्वाखाली आज (ता. ७) चेंबूर नाका येथे लोकशाहीर अण्णा भाऊ साठे पुतळ्याजवळ आंदोलन करण्यात आले. या आंदोलनात मुंबई काँग्रेसचे पदाधिकारी व कार्यकर्ते मोठ्या संख्येने सहभागी झाले होते. तसेच उत्तर मुंबईत आमदार अस्लम शेख, विलेपार्ले येथे माजी मंत्री नसीम खान आणि दक्षिण मुंबईत माजी आमदार मधू चव्हाण यांनीदेखील आंदोलन केले. या आंदोलनामध्ये सर्व जिल्हाध्यक्ष कालू बुधेलिया, क्लाइव्ह डायस, जगदीश अमीन, अब्राहम रॉय मणी, हुकुमराज मेहता आणि प्रमोद मांद्रेकर सहभागी झाले होते आणि काँग्रेसचे स्थानिक नेते, पदाधिकारी व कार्यकर्ते मोठ्या संख्येने सहभागी झाले होते.