ठाणे : शहरातील जोशी-बेडेकर आणि बांदोडकर महाविद्यालयात एनसीसीच्या विद्यार्थ्यांना जनावरांसारखी मारहाण केल्याचा प्रकार गुरुवारी (ता. ३) उघडकीस आला आहे. ही बाब एका व्हिडीओच्या माध्यमातून समोर आली असून विद्यार्थी आणि पालकांमध्ये भीतीचे वातावरण निर्माण झाले आहे;

मात्र विद्यार्थ्यांना मारहाण करणारी व्यक्ती शिक्षक नसून तो महाविद्यालयाचा विद्यार्थीच आहे, या विद्यार्थ्यावर कारवाई करण्याची प्रक्रिया सुरू करण्यात आली असल्याची माहिती महाविद्यालयामार्फत देण्यात आली.

ठाणे शहरातील विद्या प्रसारक मंडळाच्या जोशी-बेडेकर कला, वाणिज्य विभागातील प्रांगणात बांदोडकर, जोशी-बेडेकर आणि पॉलिटेक्निक या तिन्ही विभागांतील एनसीसीच्या विद्यार्थ्यांना संयुक्त पद्धतीने प्रशिक्षण दिले जाते. या प्रशिक्षणात विद्यार्थ्यांना आर्मी आणि नेव्हीचे प्रशिक्षणपूर्व धडे देण्यात येतात.

या प्रशिक्षणादरम्यान विद्यार्थ्यांकडून एखादी चूक झाल्यास त्यांना शिक्षाही करण्यात येते; परंतु ही शिक्षा अमानवी प्रकारची असल्याची धक्कादायक बाब समोर आली आहे. एनसीसी प्रशिक्षणादरम्यान विद्यार्थ्यांकडून चूक झाल्यामुळे त्यांना भरपावसात पाण्यामध्ये गुडघ्यावर टेकवून काठीने जोरजोरात फटके दिले जात असल्याचा व्हिडीओ सध्या व्हायरल होत आहे. या व्हिडीओमुळे विद्यार्थ्यांमध्ये एनसीसीबाबत दहशत पसरली आहे.

एनसीसीचे हेड हे सिनियर विद्यार्थीच असतात; परंतु हा प्रकार खूप घृणास्पद घडला आहे. शिक्षक नसताना झालेला हा प्रकार असून त्या सिनिअर विद्यार्थ्यावर तत्काळ कारवाई करण्याची प्रक्रियाही सुरू करण्यात आली आहे. त्याचबरोबर हे असले प्रकार यापुढे होऊ नयेत, यासाठी एका समितीची स्थापना तत्काळ करत आहोत. विद्यार्थ्यांनी कोणत्याही प्रकारची काळजी करू नये.
- डॉ. सुचित्रा नाईक, प्राचार्या, जोशी-बेडेकर महाविद्यालय