शिवडीत बच्चेकंपनीचा आगळावेगळा दीपोत्सव
शिवडी, ता. ५ (बातमीदार) ः सणांचे महत्त्व समजावे, मराठी शाळा व मराठी भाषा टिकावी, त्याचबरोबर विद्यार्थ्यांच्या मनात गड व किल्ले यांच्याबद्दल प्रेम व आदर निर्माण व्हावे यासाठी अभुदय एज्युकेशन सोसायटीच्या मराठी प्राथमिक शाळेमध्ये नुकतेच मुख्याध्यापिका सुप्रिया खैरे यांच्या संकल्पनेतून शिक्षकांनी विद्यार्थी व पालकांच्या मदतीने एक आगळा-वेगळा दीपोत्सव साजरा केला.
यावेळी वर्गासमोर रांगोळ्या काढण्यात आल्‍या होत्‍या. आकाश कंदील आणि दिवे लावण्यात आले होते. विद्यार्थ्यांना फराळ वाटप करण्यात आले. यावेळी छत्रपती शिवाजी महाराज यांचे गड-किल्ले प्रदर्शन भरवण्यात आले होते. विद्यार्थ्यांनी तयार केलेले विविध किल्ले या प्रदर्शनाचे मुख्य आकर्षण ठरले. ज्या विद्यार्थ्यांनी किल्ले बनवले त्या विद्यार्थ्यांनी किल्ल्यांची माहितीदेखील दिली. प्रदर्शनासाठी किशोरी तेली, लक्ष्मण ठाकरे, धोंडीराम दळवी या चौथीच्या वर्गशिक्षकांनी विद्यार्थ्यांना मार्गदर्शन केले; तर प्रदर्शनाची मांडणी व आकर्षक सजावट कलाशिक्षक नरेश पाटील यांनी केले. शाळेचे माजी विद्यार्थी व दुर्गवीर अमित जगताप, प्रशांत वाघरे, मयूर विचारे यांनी प्रदर्शनाला भेट देऊन किल्ल्यांचे महत्त्व सांगितले. दरम्यान, खाऊ व भेटवस्तू देऊन विद्यार्थ्यांचे कौतुक करण्यात आले.