घाटकोपर (बातमीदार) : शालेयस्तरावरील विद्यार्थ्यांना तसेच बालवैज्ञानिकांना प्रेरणा मिळावी या उद्देशाने शिक्षण निरीक्षक बृहन्मुंबई उत्तर विभाग आणि एन वार्ड विज्ञान प्रदर्शन व सहशालेय उपक्रम समिती यांच्या वतीने ‘समाजासाठी विज्ञान आणि तंत्रज्ञान’ या विषयावर वार्ड स्तरीय शालेय विज्ञान प्रदर्शनाचे आयोजन ११ डिसेंबर ते १३ डिसेंबर २०२३ या कालावधीत एसआयईएस डॉ. ए. पी. जे. अब्दुल कलाम मेमोरियल हायस्कूलमध्ये करण्यात आले आहे. या विज्ञान प्रदर्शनात विविध गटांतील एकूण २०४ प्रकल्पांची मांडणी केलेली आहे. या विज्ञान प्रदर्शनाचे उद्‍घाटन बृहन्मुंबई उत्तर विभागाचे शिक्षण निरीक्षक डॉ. मुश्ताक शेख यांच्या हस्ते पार पडले. या वेळी ज्येष्ठ वैज्ञानिक सुरेंद्र कुलकर्णी व एसआयईएस संस्थेचे सचिव व्यंकटरमणी प्रमुख पाहुणे म्हणून उपस्थित होते.