Palghar News: शिरसगाव ग्रामपंचायतीमधील गणेशवाडी येथील गर्भवती व तिच्या गर्भाचा काही दिवसांपूर्वी मृत्यू झाला होता. या घटनेची माहिती मिळताच भाजप आदिवासी आघाडीचे प्रदेश सचिव डॉ. हेमंत सवरा यांनी पीडित कुटुंबाच्या घरी जात सांत्वन केले. या घटनेची गंभीर दखल घेऊन सखोल चौकशी केली जाईल व दोषींवर कठोर कारवाई करण्यात येईल, असे कुटुंबाला सवरा यांनी आश्वासन दिले.

गर्भवती रूपाली भाऊ रोज (वय २५) हिला मोखाडा ग्रामीण रुग्णालय येथे उपचाराकरिता दाखल करण्यात आले होते. मात्र तिच्या गर्भाचा पोटातच मृत्यू झाल्यामुळे तिला नाशिक जिल्हा रुग्णालयात पुढील उपचारासाठी हलवले होते. त्या ठिकाणी तीन दिवस उपचार केल्यानंतर रूपालीचा मृत्यू झाला.

त्यामुळे कुटुंबीयांना प्रचंड मानसिक धक्का बसला आहे. या घटनेची माहिती मिळताच सवरा यांनी पीडित कुटुंबीयांची भेट घेतली. या वेळी पीडित कुटुंबाला अन्न-धान्याची मदत देत मानसिक आधार दिला. या वेळी भाजप मोखाडा तालुकाध्यक्ष संतोष चोथे, माजी तालुकाध्यक्ष विठ्ठल चोथे, आदिवासी आघाडी पालघर जिल्हाध्यक्ष मिलिंद झोले, खोडाळा उपसरपंच उमेश येलमामे, हनुमंत पादिर, प्रीतम काळे, दिशांत पाटील, भरत नडगे, ईश्वर गांगुर्डे, हरिश्चंद्र पाटील आदी उपस्थित होते.