Nitesh Rane: भाजप आमदार नीतेश राणे थेट पोलिसांना आव्हान देतात. मात्र त्याच्यावर कुठलीच कारवाई केली जात नाही. अशा आमदारांवर कारवाई करण्याची हिम्मत नसेल तर गृहमंत्री देवेंद्र फडणवीस यांनी राजीनामा द्यावा, अशी मागणी प्रदेश काँग्रेसचे मुख्य प्रवक्ते अतुल लोंढे यांनी केली आहे.

सोलापुरच्या सभेत आमदार नीतेश राणेनी भडकाऊ भाषण दिले म्हणून पोलिसांनी गुन्हा दाखल केला; पण पुढे कारवाई काहीच झाली नाही. अकोल्यातल्या सभेतही राणेनी गरळ ओकली. ‘पोलिस माझे काहीही बिघडवू शकत नाहीत.

व्हिडिओ काढतील आणि स्वतःच्या बायकोला दाखवतील, मी येथे आलो तर तुम्हाला कायदा सुव्यवस्था सांभाळणे मुश्कील होईल.’ महिलांचा अपमान करणारी व थेट पोलिसांना आव्हान देणारी भाषा भाजप, मुख्यमंत्री आणि दोन्ही उपमुख्यमंत्र्यांना भाषा मान्य आहे का? नीतेश राणे कायद्यापेक्षा मोठे आहेत का? कारवाई करताना सरकारच्या हाताला लकवा मारला आहे का? असे प्रश्नही लोंढे यांनी उपस्थित केले.

भडकाऊ भाषण देणाऱ्यांवर कडक कारवाई करण्याचे निर्देश सर्वोच्च न्यायालयाने दिले आहेत. परंतु भाजप न्यायालयाच्या निर्देशाला जुमानत नाहीत. हा सत्तेचा माज आहे. कायद्यापेक्षा कोणीही मोठा नाही हे पोलिसांनी लक्षात घ्यावे. सरकार येतात व जातात परंतु पोलिस व प्रशासनाने त्यांचे कर्तव्य चोख बजावावे असेही लोंढे म्हणाले.