Kalyan Crime: घरी पूजा असल्याचे सांगून चॉकलेट देण्याच्या बहाण्याने १० वर्षीय मुलीला घरी नेऊन तिच्यावर लैंगिक अत्याचार केल्याची घटना कल्याण पूर्वेत घडली आहे. याप्रकरणी पीडित मुलीच्या आईच्या तक्रारीवरून मानपाडा पोलिस ठाण्यात गुन्हा दाखल केला आहे. ( physical assault on Minor Girl kalyan)

पोलिसांनी ४२ वर्षीय व्‍यक्तीवर पोक्सोसह विविध कलमांनुसार गुन्हा दाखल करून त्याला अटक केली आहे.

अल्पवयीन मुलगी कल्याण पूर्वेत एका इमारतीत कुटुंबासह राहते. ती चौथीत शिकते. आरोपीही त्याच सोसायटीत राहतो.

गुरुवारी शाळेला सुट्टी असल्याने पीडित मुलगी तिची बहीण आणि मैत्रिणींसोबत इमारतीच्या आवारात दुपारी खेळत होती. तेव्‍हा आरोपीने आमच्या घरात पूजा आहे.

तुम्ही देवदर्शनासाठी या, असे सांगून त्यांना सोबत नेले. प्रसाद घेतल्यानंतर इतर मुली निघून गेल्या. मात्र, पीडित मुलीला चॉकलेटचे आमिष दाखवून त्याने थांबवून ठेवले आणि जबरदस्तीने तिला बेडरूममध्ये नेऊन तिच्याशी लैंगिक अत्याचार केला.

हा प्रकार कुठे सांगितल्यास मारण्याचीही धमकी मुलीला दिली. कशीबशी तिने आपली सुटका करून घेतली. मात्र, ती या प्रकाराने खूप घाबरली होती.

रडत-रडतच ती घरी आली. घडलेला प्रकार तिने घरच्यांना सांगितला. पालकांनी तत्काळ मानपाडा पोलिस ठाणे गाठून तक्रार दिली. त्यावरून आरोपीविरोधात गुन्हा नोंदवून त्याला अटक करण्यात आली आहे.

याप्रकरणी डोंबिवली विभागाचे सहायक पोलिस आयुक्त सुनील कुराडे यांच्या मार्गदर्शनाखाली पोलिस अधिक तपास करत आहेत.