Mumbai : बांधकाम व्यावसायिकाला खंडणीसाठी धमकाविणाऱ्या तिघांविरुद्ध मालवणी पोलिसांनी गुन्हा नोंदविला आहे. झाकीर हुसैन सय्यद ऊर्फ झाकीर डॉट कॉम, आमीरअली झाकीर सय्यद, उमेद झाकीर सय्यद अशी या तिघांची नावे आहेत.

यातील तक्रारदार त्याच्या कुटुंबीयांसोबत मालवणी परिसरात राहतात. पूर्वी तो रिक्षाचालक म्हणून काम करत होता. मात्र कोरोनामुळे काम बंद झाल्याने त्याने बांधकामाचा व्यवसाय सुरू केला होता.

याचदरम्यान त्याला झाकीरसह त्याच्या दोन मुलांकडून सतत खंडणीसाठी धमकी येत होती. व्यवसाय वाढत असल्याने, तसेच त्यांची प्रचंड दहशत असल्याने त्याने त्यांना ऑनलाईन खंडणीची रक्कम देण्यास सुरुवात केली होती.

जानेवारी २०२१ ते डिसेंबर २०२३ या कालावधीत त्याने खंडणी स्वरूपात अकरा लाख चौदा हजार रुपये पाठविले होते. तरीही ते तिघेही सतत त्याला खंडणीसाठी धमकी देत होते. त्यामुळे त्या व्यावसायिकाने मालवणी पोलिसांत तक्रार केली होती.