पोलादपूरमधून तटकरेंच्‍या प्रचाराला सुरुवात
पोलादपूर, ता. १० (बातमीदार) ः महायुतीचे लोकसभेचे उमेदवार सुनील तटकरे यांचा प्रचाराचा शुभारंभ पोलादपूर येथून करण्यात आला. यावेळी तटकरे यांनी महाविकास आघाडीचे उमेदवार अनंत गीते यांच्‍यावर टीका केली.
शहरातील शिवाजीनगर येथे महायुतीच्या घेण्यात आलेला सभेत खासदार सुनील तटकरे यांनी बाटलीत भरा, सैतान, मी बुच लावतो हे शब्द उच्चारणे एका लोकसभेच्या उमेदवाराला शोभत नसल्‍याचे सांगून गीते यांचा समाचार घेतला. तसेच आमदार भरत गोगावले यांनी केलेल्या विकासकामांबाबत कौतुक केले. आमदार भरत गोगावले यांनी मतदारसंघात मागील वर्षभरात केलेल्या हजारो कोटी रुपयांच्या विकासकामांची यादी वाचून दाखविली. तसेच पंतप्रधान नरेंद्र मोदी यांनी सुरू केलेल्या योजनांबाबत माहिती दिली. शिवाय गीते यांच्यावर सडकून टीका करत विकासासाठी तटकरे यांना भरघोस मतांनी निवडून देण्याचे आवाहन केले. यावेळी युवा सेना कोअर कमिटी सदस्य विकास गोगावले, भारतीय जनता पार्टी रायगड जिल्हा उपाध्यक्ष मनोज भागवत, माजी रायगड जिल्हा परिषद उपाध्यक्ष चंद्रकांत कळंबे यांनीही यावेळी मनोगत व्यक्त केले.
......................