नवी मुंबई, ता. २ (वार्ताहर) : नवी मुंबई पोलिसांच्या अनैतिक मानवी वाहतूक प्रतिबंधक कक्षाने गत गुरुवारी सायंकाळी तुर्भे नाका येथील हॉटेल राज लॉजिंग ॲन्ड बोर्डिंगवर छापा मारून त्याठिकाणी वेश्या व्यवसाय चालवणाऱ्या लॉजच्या व्यवस्थापकाला ताब्यात घेतले. या कारवाईत पोलिसांनी चार महिलांची सुटका केली आहे. तुर्भे नाका येथील हॉटेल राज लॉजिंग ॲन्ड बोर्डिंगमधील व्यवस्थापक त्याच्या लॉजमध्ये येणाऱ्या ग्राहकांना तीन हजार रुपयांमध्ये महिला-मुली पुरवित असल्याची माहिती अनैतिक मानवी वाहतूक प्रतिबंधक कक्षाला मिळाली होती. त्यानुसार वरिष्ठ पोलिस निरीक्षक पृथ्वीराज घोरपडे व त्यांच्या पथकाने गुरुवारी सायंकाळी बनावट ग्राहकाला पाठवून खात्री केली. त्यांनतर पोलिसांनी या लॉजवर छापा मारला असता, वेश्या व्यवसायासाठी चार मुली व महिला ठेवण्यात आल्याचे आढळून आले. पोलिसांनी केलेल्या चौकशीत लॉजमधील व्यवस्थापक अजय गोस्वामी व किशोर साहू व मालक राज जनार्दन गौरी या तिघांविरोधात तुर्भे एमआयडीसी पोलिस ठाण्यात पीटा कायद्याअंतर्गत गुन्हा दाखल करण्यात आला आहे.