नवी दिल्ली : मनसे अध्यक्ष राज ठाकरे यांनी मनसेच्या पाडवा मेळाव्यात जोरदार भाषण केलं. यामध्ये त्यांनी राज्यातील महाविकास आघाडी सरकारवर हल्लाबोल केला तसेच इतर राज्यातील भाजपच्या कारभाराचं कौतुकंही केलं. उत्तर प्रदेशचा विकास होतोय, अशा शब्दांत त्यांनी योगी आदित्यनाथ यांचं कौतुक केलं. (Uttar Pradesh is developing Raj Thackeray complimented UP CM yogi)

राज ठाकरे म्हणाले, आज मला आनंद होतोय की, उत्तर प्रदेशचा निकाल लागला आणि कळलं की उत्तर प्रदेशात विकास होतोय. हेच तर पाहिजे. तुम्हाला आठवतं असेल की, मी म्हणालो होतो २०१४ साली नरेंद्र मोदी सत्तेत येतील तेव्हा त्यांनी आल्यानंतर पहिल्यांदा फक्त तीन राज्यांमध्ये लक्ष द्यावं, उत्तर प्रदेश, बिहार आणि झारखंड. या तीन राज्यांचा त्यांनी विकास करावा. या तीन राज्यांमधून लोक बाहेर पडत आहेत. त्यांना त्यांच्याच राज्यांमध्ये रोजगार मिळू दे, त्यांना घर सोडायची वेळ येऊ देऊ नका.

आज माझ्या कानावर बातम्या येतंय की, त्या ठिकाणी विकास होतोय. तर ही चांगली गोष्ट आहे. प्रत्येक राज्यात हा विकास व्हायला हवा. प्रत्येकाचं ओझं घ्यायला महाराष्ट्र इथं बसलेला नाही. पण तुम्ही या गोष्टीचा विचार करत नाही. वर्तमान पत्रांमधील ओळी वाचता पण त्याच्या मधलं वाचत नाही, हे तुमच्याशी काय खेळत आहेत, अशा शब्दांत राज ठाकरे यांनी जनतेला आवाहन केलं.