दादर येथील महापालिकेच्या महात्मा गांधी जलतरण तलावात मगरीचे पिल्लू आढळून आल्यामुळे एकच गोंधळ उडाला होती. मगरीचे पिल्लू वन विभागाने ताब्यात घेतले मात्र, ते जलतरण तलावात कुठून आले याचीच चर्चा रंगली होती. जवळच असलेल्या बेकायदा प्राणिसंग्रहालयातून ते आले असावे, असा अंदाज पालिकेने व्यक्त केला असून त्यावर कारवाई करावी, अशी मागणी देखील करण्यात आली होती.

तर ही मगर कुठून आली त्यासंबधी माहिती समोर आली आहे. शेजारीच असलेल्या प्राणीसंग्रहालयातून ही मगर आल्याचे सीसीटीव्हीमध्ये स्पष्ट दिसून येत आहे. मगर सापडल्यानंतर वन अधिकाऱ्यांनी अज्ञातांविरोधात गुन्हा दाखल करून घेतला होता. तर आता सीसीटीव्हीमध्ये ही मगर शेजारील प्राणीसंग्रहालयातून आल्याचे स्पष्ट झाल्यानंतर मात्र मनसेने हा गुन्हा शेजारी असलेल्या प्राणीसंग्रहालयाच्या मालकावर करावा अशी मागणी केली आहे.

या प्राणी संग्रहालयातूनच मगर आल्याचं सीसीटीव्हीमध्ये स्पष्ट झालं असून, या प्राणी संग्रहालयावर कारवाई करून मालकाविरोधात गुन्हा दाखल करण्याची मागणी मनसेने केली आहे. बेकायदेशीर रित्या हे प्राणी संग्रहालय चालवलं जातंय आणि तिथे प्राण्यांची तस्करी देखील होते असा आरोप मनसेच्यावतीने करण्यात आला आहे.

स्विमिंग पूलमध्ये सकाळी अनेक लोकं पोहायला येत असतात, मात्र कोणी पोहायला येण्यापूर्वीच ही मगर स्विमिंग पूलमध्ये आढळून आल्याने अनर्थ टळला आहे. दरम्यान या प्रकरणी योग्य ती कारवाई करण्याची मागणी केली जात आहे.