हिमायतनगर : येथे गेल्या सोमवारी परमेश्वर मंदिर परिसरात ठिकठिकाणी धाडी टाकून पानपट्टी धारक, किरकोळ विक्रेत्यांवर अन्न व औषध प्रशासनाने कारवाई केली. दंडही आकारण्यात आला. एक बाब विशेष अशी की, शहरात दोन मोठे घाऊक विक्रेते आहेत. हे जगजाहीर असतांना, या मोठ्या विक्रेत्यांना सोडून किरकोळ विक्रेत्यांवर कारवाई करून प्रशासनाने फुशारकी मारून घेतली असल्याची चर्चा शहरात चवीने केली जात असून, प्रशासनाच्या कारवाईत चोर सोडून सन्याश्याला फाशी दिल्या गेली असल्याने संतप्त प्रतिक्रिया ऐकावयास मिळत आहेत. शहरातील नागरिकांनी अधिकाऱ्यांना घेराव घालून जाब विचारण्याचाही प्रयत्न केला. परंतू पोलिसांनी वेळीच हस्तक्षेप करून जमावाला शांत केले.

हिमायतनगर शहर हे गुटख्याचे माहेरघर म्हणून सर्वदूर परिचित आहे. येथूनच जवळपास इतर जिल्ह्यात गुटखा पार्सल होत असतो. येथे दोन घाऊक विक्रेते असून यांच्याकडून दररोज लाखो रूपयाचा गुटखा आयात व निर्यात केला जातो. हे आता लपून राहिलेले नाही. दिवाळीनंतर अन्न व औषध प्रशासन अ‍ॅक्शन मोडवर आल्याचे दिसून येत आहे. परंतू आश्चर्याची बाब अशी ठरते की, कारवाईत खरे मोठे विक्रेते जाणीवपूर्वक अर्थपुर्ण व्यवहारानंतर बाजूला फेकले.