नांदेड : जिल्ह्यात कोरोनाचा फैलाव दुसऱ्यांदा मोठ्या प्रमाणात सुरु झाला आहे. त्या पार्श्वभूमीवर ता. 31 मार्चपर्यंत लॉकडाऊनची अंमलबजावणी सुरु असल्याने जिल्हाधिकारी आणि पोलिस अधीक्षक यांच्या आदेशावरुन इतवारा पोलिस ठाण्याच्या हद्दीत नाकाबंदी दरम्यान कर्तव्य बजावणाऱ्या एका पोलिस कर्मचाऱ्यास मारहाण केली. यावरुन शासकीय कामात अडथळा निर्माण करणाऱ्या विरुद्ध इतवारा पोलिस ठाण्यात गुन्हा दाखल करण्यात आला आहे. हा धक्कादायक प्रकार बाफना टी पाॅईन्ट येथे गुरुवारी (ता. १८) रात्री घडला.

याबाबत अधिक माहिती अशी की इतवारा पोलिस ठाण्याचे पोलिस हवालदार एकनाथ मोकले हे आपल्या सहकाऱ्यांसह बाफना टी पॉइंट येथे गुरुवारी (ता. १८) नाकाबंदी करत होते. यावेळी तेथे आरोपीने येऊन तुम्ही यहाॅं नाकाबंदी क्यूं कर रहे, यहा नाकाबंदी मत करो असे म्हणून पोलिसांशी हुज्जत घातली. एवढेच नाही तर श्री. मोकले यांच्या गणवेशाचे कॉलर पकडून पोलिसाच्या श्रीमुखात भडकावली. यात श्री मोकले यांच्या तोंडाला जबर दुखापत झाली आहे. त्यानंतर त्यांच्या सहकाऱ्यांनी गोंधळ घआलणाऱ्यास ताब्यात घेतले. त्याची वरात पोलिस ठाण्यापर्यंत काढली. तेथेही त्याला सुंदरीचा प्रसाद दिला. एकनाथ मोकले यांच्या फिर्यादीवरुन इतवारा पोलिस ठाण्यात मारहाण करणाऱ्या विरुद्ध गुन्हा दाखल करण्यात आला आहे. तपास फौजदार दत्तात्रय काळे करत आहेत.

हेही वाचा - नांदेडमधील कौठ्यात उभारणार अत्याधुनिक सुविधायुक्त क्रीडा संकुल - पालकमंत्री अशोक चव्हाण

उस्माननगर ग्रामपंचायतमध्ये गोंधळ

तर दुसर्‍या घटनेत महिला ग्रामसेविकेच्या फिर्यादीवरुन उस्माननगर पोलिस ठाण्यात ग्रामपंचायत कार्यालयात येऊन गोंधळ घालणाऱ्या विरुद्ध गुन्हा दाखल करण्यात आला आहे. उस्माननगर ग्रामपंचायतीमध्ये मासिक सभा सुरु असताना माझ्या घरापर्यंत नाली बांधकाम का आणले नाही असे म्हणून महिला ग्रामसेविकाच्या अंगावर धावून एकाने शिवीगाळ केली. जीवे मारण्याची धमकी देत शासकीय कार्यात अडथळा निर्माण केला. एवढेच नाही तर कार्यालयातील प्रिंटर उचलून फेकून देऊन तोडफोड केली. यात जवळपास 15 हजार रुपयांचे नुकसान झाले आहे. ग्रामसेविका देऊबाई शिंदे यांच्या फिर्यादीवरुन उस्माननगर पोलिस ठाण्यात गोंधळ घालणार्‍या आरोपीविरुद्ध गुन्हा दाखल करण्यात आला आहे. तपास पोलिस फौजदार श्री थोरे करत आहेत.