नांदेड : हातात पिस्तुल, तलवार किंवा इतर शस्त्र दाखवून काढलेले फोटो व्हॉट्सॲप स्टेट्सवर किंवा इतर सोशल मीडियावर टाकणे चौघांच्या अंगलट आले आहे. पोलिसांनी सायबर सेलच्या मदतीने याबाबत चार जणांविरूद्ध विमानतळ पोलिस ठाण्यात गुन्हा दाखल केला आहे. त्यामुळे अशी कृती करताना काळजी घेण्याचे आवाहन पोलिस विभागातर्फे करण्यात आले आहे.

बांधकाम व्यावसायिक संजय बियाणी यांची गोळ्या मारून हत्या झाल्यानंतर पोलिसांनी सतर्क राहत आत्तापर्यंत पिस्तुल प्रकरणात गुन्हे दाखल झालेल्यांची चौकशी सुरू केली आहे. दरम्यान, काहीजण सोशल मीडियाच्या माध्यमातून आपल्या अकाऊंटवर किंवा स्टेटसवर बंदूक, पिस्तुल, तलवार किंवा इतर शस्त्र हातात दाखवून फोटो व्हायरल करत आहेत. अशांची देखील पोलिसांनी सायबर सेलच्या माध्यमातून तपासणी सुरू केली आहे. त्यामध्ये चार जण आढळून आले असून पोलिसांनी त्यांना ताब्यात घेतले आहे. याबाबत विमानतळ पोलिस ठाण्यात गुन्हा दाखल करण्यात आला असून पुढील तपास करण्यात येत असल्याची माहिती पोलिसांनी दिली.