नांदेड : दोन जणांनी संगनमत करून एका विद्यार्थ्याला ठार मारण्याची धमकी देऊन पाच हजार रूपये खंडणीची मागणी केली आहे. या प्रकरणी वजिराबाद पोलीस ठाण्यात गुन्हा दाखल करण्यात आला आहे.

पोलीसांनी दिलेल्या माहितीनुसार, शहरातील दिलीपसिंग कॉलनीतील जलाराम मंदिर येथे अनुराग नंदलाल जाट (वय १५, रा. अमली, ता. हरीमगड, जि. भिलवड, राज्यस्थान हल्ली मुक्काम जलाराम मंदीर, नांदेड) यास ता. १२ ऑक्टोंबर ते ता. दहा डिसेंबर दरम्यान, दिलीपसिंग कॉलनी येथील जलाराम मंदीर येथे दोन आरोपितांनी संगनमत करून धमकी दिली.

मागील दोन महिन्यांपासून खंजरने मारण्याची धमकी देऊन खर्चासाठी पाच हजार रुपये पैशांची मागणी केली. त्याच्या भीतीपोटी अनुरागने घरी जाऊन आईच्या लॉकरमधून वेळोवेळी दोन हजार रूपये काढून दिले.

त्यानंतर देखील ता. दहा डिसेंबर रोजी दुपारी दोनच्या सुमारास अनुराग हा जलाराम मंदीर येथे जात असताना तेथे या दोन आरोपींनी त्याला भेटून खंजर दाखवून घरी जाऊन पाच हजार रूपये घेऊन ये, नाहीतर तुला ठार मारतो, अशी धमकी दिली. त्यामुळे या प्रकरणी वजिराबाद पोलीस ठाण्यात गुन्हा दाखल करण्यात आला. सहायक पोलीस निरीक्षक मंठाळे पुढील तपास करत आहेत.