नांदेड : घरात बसून दारू पिण्यास विरोध केल्यामुळे पतीने पत्नीला जबर मारहाण केली. त्यात तिचा मृत्यू झाला असून घटनेनंतर आरोपी पती फरार झाला आहे. ही खळबळजनक घटना थडीसावरगाव (ता. देगलूर) येथे सोमवारी (ता. ११) रात्री घडली.

अनुसया इरवंत पाटील असे मृत पत्नीचे नाव आहे. थडी सावरगाव येथील इरवंत पाटील आणि अनुसया पाटील या पती पत्नीमध्ये वाद झाला. सोमवारी रात्री साडेनऊ वाजता त्यांच्या राहात्या घरी अनुसया पाटील आणि त्यांचे पती इरवंत पाटील यांचे घरी दारू पिण्याच्या कारणावरून भांडण झाले.

त्यात इरवंत पाटील यांनी तिला कशाने तरी मारहाण करून उजव्या डोळ्यावर, उजव्या हातावर, पाठीवर, मांडीवर डोक्यात मारून गंभीर जखमी केले. त्यात तिचा मृत्यू झाला आणि तो घटनास्थळावरून पळून गेला. या प्रकरणी अनुसया यांचे वडील यादवराव भिमराव लक्कावार (वय ७०, रा. टाकळी मोठी ता. डोंगळी, जि. कामारेड्डी, तेलंगणा) यांनी दिलेल्या तक्रारीवरून देगलुर पोलीस ठाण्यात गुन्हा दाखल करण्यात आला आहे. पुढील तपास फौजदार फड करत आहेत.