अर्धापूर : यंदाचे वर्ष पूर्ण निवडणुकीत जाणार आहे. लोकसभेच्या निवडणुकीचे वारे वाहू लागल्याने हिवाळ्यात राजकीय वातावरण तापू लागले आहे. विविध राजकीय पक्षांनी निवडणुकीची तयारी सुरू केली असून बैठका, मेळावे आयोजित करून वातावरण निर्मिती केली जात आहे. मतदारांशी विविध माध्यमांतून संपर्क केला जात आहे. निवडणुकीचा काळ असल्याने पक्षातील नाराज पदाधिकारी व कार्यकर्त्यांना सध्या ‘अच्छे दिन’ आले आहेत. जिल्हास्तरावर काम करणारे नेते सक्रिय झाले असून फिरताना दिसत आहेत.

लोकसभेच्या निवडणुका जवळ आल्याने महाविकास आघाडी व महायुतीच्या घटक पक्षांनी निवडणुकीची तयारी सुरू केली असून मतदारांशी संपर्क केला जात आहे. मतदान केंद्रनिहाय बांधणी, संघटनात्मक पातळीवर पदाधिकारी नियुक्त्या करण्यात येत आहेत. राजकीय पक्षांची संख्या वाढल्याने पदांचा सुकाळ झाला असून कार्यकर्त्यांचा दुष्काळ पडला असल्याचे चित्र दिसून येत आहे.

महायुतीच्या जागा वाटपात नांदेडची जागा भारतीय जनता पक्षाला सुटणार हे निश्चित असल्याने भारतीय जनता पक्ष निवडणुकीच्या तयारीला गेल्या काही महिन्यांपासून लागला आहे. प्रमुख पदाधिकारी व कार्यकर्त्यांच्या बैठका, मेळावे घेण्यात आले आहेत.

तसेच संघटनात्मक पातळीवर बदल करून नाल्यांना संधी देण्यात आली आहे. महिलांचे मेळावे घेऊन विविध योजनांची माहिती देण्यात येत आहे. विद्यमान खासदार प्रताप पाटील चिखलीकर यांनी मीच उमेदवार राहणार व निवडून येणार असा दावा केला आहे. तसेच त्यांनी तालुक्यातील विविध गावांमध्ये जनसंपर्क वाढविला आहे. त्यांनी स्वतःची स्वतंत्र निवडणूक यंत्रणा कामाला लावली आहे.

पक्षाकडून मनधरणी सुरू

भोकर विधानसभा मतदारसंघात अर्धापूर तालुक्याचा समावेश होतो. गेल्या लोकसभेच्या निवडणुकीत काँग्रेसला या मतदारसंघातून जास्त मताधिक्याची अपेक्षा होती. पण तसे झाले नाही. या मतदारसंघातून अशोक चव्हाण यांना लोकसभेसाठी नाममात्र मताधिक्य मिळाले होते. त्यात अर्धापूरचा वाटा खूप मोठा होता. पण लोकसभा निवडणुकीच्यानंतर झालेल्या विधानसभा निवडणुकीत अशोक चव्हाण यांना ९८ हजारांचे मताधिक्य मिळाले होते. हेच मताधिक्या साठी काँग्रेसचे प्रयत्न सुरू आहेत. पक्षात अडगळीत पडलेल्या पदाधिकारी व कार्यकर्त्यांची नाराजी दूर करण्यात येत आहे.

काँग्रेसच्या उमेदवाराबाबत उत्सुकता

नांदेडची जागा महाविकास आघाडीच्या जागावाटपात काँग्रेसला सुटणार हे निश्चित आहे. पण काँग्रेसचा उमेदवार कोण असेल? हे अद्याप अनिश्चित आहे. माजी मुख्यमंत्री अशोक चव्हाण हे लोकसभा निवडणूक लढविण्यासाठी फारसे उत्सुक नसले तरी तेच काँग्रेसचे उमेदवार असतील, असे काँग्रेसचे पदाधिकारी सांगत आहेत. जर दुसरा उमेदवार देण्याची वेळ आली तर डॉ. मीनल पाटील खतगावकर यांच्या नावाचा विचार केला जाऊ शकतो, अशी राजकीय वर्तुळात चर्चा सुरू झाली आहे.