नांदेड : श्री गणेश विसर्जनानिमित्त शहरात गुरूवारी (ता. २८) सकाळी अकरा ते रात्री बारा वाजेपर्यंत शांतता व सुव्यवस्था राखण्यासाठी जिल्हा पोलिस अधीक्षक श्रीकृष्ण कोकाटे यांनी महाराष्ट्र पोलीस अधिनियम अन्वये वाहतुक व्यवस्थेत बदल करण्याचे आदेश काढले आहेत. त्याचबरोबर शहर आणि जिल्ह्यात महत्वाच्या ठिकाणी पोलिस बंदोबस्त तैनात करण्यात आला आहे.

नांदेड शहराच्या विविध भागातून गुरूवारी श्री गणेश विसर्जन होणार असून मुख्य रस्त्यावर विसर्जनाच्या व वाहनांच्या वाहतूक व्यवस्थेत एक दिवसासाठी तात्पुरत्या स्वरुपात पर्यायी मार्गांवरील वाहतूकीस वळण देऊन बदल करण्यात येत आहे. वाहतूकीस अडथळा होऊ नये, यासाठी पर्यायी मार्गाची अधिसूचना प्रसिध्द करण्यात आली आहे.

वाहतुकीसाठी पर्यायी मार्ग

१) वजिराबाद चौकाकडून श्रीनगर, वर्कशॉपकडे जाणारी वाहतूक वजिराबाद चौक, पोलीस मुख्यालय कार्नर, लालवाडी अंडर ब्रिज, शिवाजीनगर, पिवळी गिरणी ते गणेशनगर वाय पॉईन्टकडे जाण्या येण्यासाठी वापर करतील.

२) राज कॉर्नर ते जुना मोंढा मार्गावरील वाहतूक राज कॉर्नर, वर्कशॉप कॉर्नर, भाग्यनगर, आनंदनगर, नागार्जुना टी पॉईंट, अण्णाभाऊ साठे चौक, यात्री निवास पोलीस चौकी, अबचलनगर ते पुढे जाण्या येण्यासाठी वापर करतील.

३) गोवर्धन घाट पुलावरुन नांदेड शहरात येणारी वाहतूक ही तिरंगा चौक, पोलीस मुख्यालय कॉर्नर, लालवाडी अंडरब्रिज, शिवाजीनगर पिवळी गिरणी ते गणेश नगर वाय पॉईंटकडे जाण्यासाठी वापर करतील.

४) सिडको हडकोकडुन नांदेड शहरात येणारी वाहतुक साई कमान कौठा, पोलीस चौकी, रवीनगर, गोवर्धन घाट नवीन पुल, तिरंगा चौक, पोलीस मुख्यालय कार्नर, लालवाडी अंडर ब्रिज, शिवाजीनगर, पिवळी गिरणी ते गणेश नगर वाय पॉईंटकडे जाण्यासाठी वापर करतील.

वाहतुकीसाठी बंद असलेले मार्ग

१) जुना मोंढा, देना बँक, महावीर चौक, तरोडेकर मार्केट, वजिराबाद चौक, कलामंदिर, शिवाजीनगर ते आयटीआय चौकापर्यंत जाण्या येण्यास बंद राहील.

२) राज कॉर्नरकडून आयटीआयकडे येण्यासाठी राज कॉर्नर, वर्कशॉप टी पॉईंट, श्रीनगर ते आयटीआय पर्यंत डावी बाजू बंद राहील.

३) राज कॉर्नर ते तरोडा नाक्याकडे जाण्यासाठी वाहतुकीसाठी डावी बाजू बंद राहील.

४) सिडको, हडको, जुना मोंढ्याकडे येणारी वाहतुक पुर्णपणे बंद राहील.