मांगूर (बेळगाव) : मूळचे एकसंबा येथील रहिवासी व पट्टणकडोली येथे स्थायिक असलेल्या अझरुद्दीन तांबोळी (चौधरी) व आयेशा तांबोळी या  दापंत्याच्या पोटी जन्मलेल्या 22 दिवसाच्या बालकावर अत्यंत किचकट व महत्त्वपूर्ण शस्त्रक्रिया करून मूळचे कारदगा येथील व सध्या निपाणी येथे स्थायिक असलेले डॉ. शीतल धरणगुत्ते यांनी जीवदान दिले.

कोरोनासारख्या गंभीर काळात हे यश आल्याने तांबोळी कुटुंबीयांच्या जीवनात आनंदाचा फुलोरा बहरला आहे.
त्यामुळे डॉ. धरणगुते यांचे कौतुक होत आहे.तांबोळी दांपत्याला कोल्हापुरातील एका खासगी हॉस्पिटलमध्ये अपत्य प्राप्ती झाल्यानंतर दुसऱ्याच दिवशी बालकास श्वासोच्छासाचा त्रास उद्भभवून लॅटिंगो मलेरिया हा आजार झाला होता. बरेच दिवस त्या खासगी हॉस्पिटलमध्ये ठेवून सुद्धा आजाराचे निदान लागत नव्हते.

हेही वाचा- सरीवरसरी : मान्सूनच्या पहिल्याच पावसाची विक्रमी  नोंद ;  2 तासात 9 इंचापेक्षा अधिक पाऊस -

दोन-तीन इतर हॉस्पिटलमध्ये सुद्धा काही दिवस मुलाला ठेवले. पण काही उपचार न झाल्याने शेवटी कुटुंबीयांनी कारदगा येथील डॉ. अभिनंदन मुराबट्टे यांच्या सल्ल्याने  डॉ. शीतल धरणगुत्ते यांची भेट घेतली. बाळाच्या आजारची लक्षणे सांगितल्यानंतर त्यांनी  नेमके निदान केले. तात्काळ कोल्हापूर येथील हॉस्पिटलमध्ये आपल्या सहकारी डॉक्टरांच्या टीममार्फत यशस्वी शस्त्रक्रिया करून मृत्यूशी झुंज देणाऱ्या 22 दिवसीय बालकास जीवदान दिले.डॉ. धरणगुत्ते यांना या शस्त्रक्रियेमध्ये डॉ. अमित गिरवाल , डॉ. खलील मुल्ला, डॉ. जगदीश सर्वज्ञ, डाॅ. साईनाथ पवार  यांचे सहकार्य मिळाले.

हेही वाचा- केएमटी चे अतिरिक्त परिवहन व्यवस्थापक आरटीओ निरीक्षक सुभाष देसाई यांचे निधन.... -
कारदगा ग्रामस्थांनी निपाणी येथील  हॉस्पिटलमध्ये डॉ. धरणगुत्ते यांची भेट घेऊन त्यांचा सत्कार केला. यावेळी ग्राम पंचायत सदस्य राजू खिचडे, माजी उपाध्यक्ष भरत भागाजे, माजी ग्रामपंचायत सदस्य इस्माईल पटेल, उस्मान मकानदार, तबरेझ अत्तार, बंदीनमाज जमादार उपस्थित होते.

हेही वाचा- लूक बदलतोय, डिझायनर मास्क .... 

पैशापेक्षा दिले माणुसकीला महत्त्व 

आजकाल वैद्यकीय क्षेत्राला अर्थकारणाचे वलय निर्माण झाले आहे. एखादा पेशंट खासगी दवाखान्यात गेला की डिस्चार्ज मिळेपर्यंत पेशंटची व नातेवाईकांची अवस्था नेमकी काय होते, हे प्रत्येकांना माहित आहे. पण अशा या काळात 
सुद्धा पैशापेक्षा माणुसकीला महत्त्व देणारा माणसातला देव माणूस म्हणून डॉ. धरणगुत्ते यांनी कोरोनासारख्या महामारीच्या काळात अत्यल्प खर्चात किचकट शस्त्रक्रिया करून सर्वसामान्य कुटुंबाला आधार देण्याचे काम केले आहे.