कारदगा (बेळगाव) : ढोणेवाडी येथील महिलेला शेतात काम करत असताना विषारी सर्पाने दंश केला होता. तिला सांगलीच्या सरकारी रुग्णालयात दाखल केले होते. पण उपचारास प्रतिसाद न मिळाल्याने गुरुवारी (१) रात्री दुर्दैवी मृत्यू झाला. अनिता बाबासाहेब सादळकर (वय ५६) असे मयत महिलेचे नाव आहे. या घटनेमुळे कुटुंबावर आभाळ कोसळले असून गावावर शोककळा पसरली आहे.

याबाबत अधिक माहिती अशी, अनिता सादळकर या शनिवारी (२०) पठार परिसरातील स्वतःच्या शेतात काही महिला मजुरांना घेवून ऊस भांगलणीसाठी गेल्या होत्या. उसाच्या सरीत बसून तण काढताना पाठीमागून विषारी सपाने दंश केला. काहीतरी टोचले म्हणून हातातील खुरपे मागे फिरवले. पण पुन्हा सापाने दंश केला. मागे फिरून पाहिले तर सर्प होता. तातडीने अनिता सादळकर यांनी सर्पदंशाची माहिती घरात सांगितल्यावर सांगली सरकारी रुग्णालयात उपचारासाठी दाखल करण्यात आले. तेथे बारा दिवस उपचार केले. पण विष किडनीतील रक्तात मिसळल्याने उपचारास प्रतिसाद मिळाला नाही. अखेर गुरुवारी त्यांचा मृत्यू झाला. महिला व बालकल्याण मंत्री शशिकला जोल्ले, खासदार अण्णासाहेब जोल्ले व तहसीलदारांनी  शासनाच्या आपत्ती निवारण निधीतून सादळकर कुटुंबीयांना आर्थिक मदत मिळवून देण्याची मागणी ग्रामस्थांतून होत आहे. त्यांच्या मागे पती, मुलगा, मुलगी असा परिवार आहे.

हेही वाचा - महाराष्ट्रात बंदी असलेल्या गोवा बनावटीच्या  दारूचे अठरा बॉक्स पकडले ; दोघे ताब्यात

ढोणेवाडी परिसरातून हळहळ

अनिता सादळकर या अत्यंत कष्टाळु महिला होत्या. त्यांचा दुर्देवी मृत्यू झाल्याने सादळकर कुटुंबावर शोककळा पसरली आहे. त्यामुळे ढोणेवाडी गावासह परिसरातून हळहळ व्यक्त होत आहे.