नगर ः वारस नोंद, बोजा, गहाणखत, बोजा कमी करणे, ई-करार नोंदी, मृताचे नाव कमी करणे, विश्‍वस्तांचे नाव बदलणे आदी आठ प्रकारच्या फेरफारसाठी अर्ज करण्यासाठी खातेदाराला वारंवार तलाठी कार्यालयात हेलपाटे मारावे लागतात. मात्र, आता इंडिया भूमिअभिलेखाचे आधुनिकीकरणांतर्गत ई-हक्क प्रणाली कार्यान्वित करण्यात आली. या प्रणालीमुळे खातेदारांना वेगवेगळ्या हक्काच्या नोंदीसाठी ऑनलाइन अर्ज करता येणार आहेत. त्यामुळे तलाठ्यांच्या कामकाजात गतिमानता, पारदर्शकपणा येणार आहे. खातेदारांच्या वेळ, अनाठायी पैशांची बचत होणार आहे. 

हेही वाचा ःविषबाधा झाल्याने दोन मुलांचा मृत्यू

खातेदाराला तलाठी कार्यालयाकडे सात-बारावर हक्‍काच्या नोंदी फेरफारच्या स्वरूपात घेण्यासाठी अर्ज करावे लागतात. यापुढे ते अर्ज ऑनलाइन दाखल करता येतील. प्रणालीचा वापर खातेदारांसह बॅंका, सहकारी सोसायट्या, पतसंस्थांनादेखील वापरता येईल. त्यासाठी बॅंक प्रतिनिधी, सोसायटी सचिव व खातेदार यांना hpps:// pdeigr.maharashtrs.gov.in या संकेतस्थळावर नोंदणी करावी लागणार आहे. पूर्ण नाव, पत्ता, मोबाईल नंबर, ई-मेल आयडी, पॅन कार्ड नंबरची माहिती द्यावी लागणार आहे. ऑनलाइन अर्ज दाखल करताच खातेदाराला अर्जाच्या प्रतीसह संकेतांक क्रमांक मिळेल. त्या आधारे अर्जाची स्थितीही पाहता येणार आहे. 

हेही वाचा ः कामगारांचे थकले साडेसतरा कोटी

नागरिकांचा वेळ, पैसा वाचणार 

या प्रणालीमुळे नागरिकांचा वेळ, पैसा व त्रास वाचणार आहे. तसेच महसुल कर्मचाऱ्यांवरील कामाचा ताण काही प्रमाणात कमी होणार आहे. नागरिकांच्या चकरा आणि अडवणूक कमी होणार आहे. तसेच गैरव्यवहार कमी होणार आहे. नागरिकांना घरबसल्या नोंदीसाठी ऑन लाईन अर्ज करता येणार आहे. 

तलाठ्यांच्या कामात येणार गतिमानता 

ई-हक्‍क प्रणालीद्वारे खातेदाराचा अर्ज तलाठ्यांना ई-फेरफारमध्ये प्राप्त करता येऊन फेरफारमध्ये रूपांतरित करता येणार आहे. ही प्रणाली ई-फेरफार प्रणालीशी संलग्न करण्यात आली आहे. प्रणालीच्या वापरामुळे तलाठ्यांच्या कामकाजात गतिमानता व पारदर्शकता येण्यास निश्‍चित मदत होणार आहे. 
- ऊर्मिला पाटील, उपजिल्हाधिकारी