मिरज : येथे अनंत चतुर्दशी (Anant Chaturdashi) दिवशीच्या गणेश विसर्जन (Ganesh Visarjan) सोहळ्यात कर्णकर्कश ध्वनियंत्रणेचा (Sound Systems) दणदणाट करणाऱ्या ३५ ध्वनियंत्रण चालकांवर, तसेच गणेश मंडळांच्या अध्यक्षांवर कारवाईच्या नोटिसा पोलिस प्रशासनाकडून देण्यात आल्या आहेत.

नोटिसीमध्ये विसर्जन सोहळ्यात ध्वनिमर्यादेचे उल्लंघन केल्याचे म्हटले आहे. या अनुषंगाने प्राप्त अहवालात मंडळांनी नियमांचे सर्रास उल्लंघन आणि डेसिबल मर्यादा ओलांडल्याचे सिद्ध झाले आहे. यंदा मिरज शहरात अनंत चतुर्दशी दिवशी गणेश विसर्जन मिरवणुकीत नियमांच्या अधिन राहून ध्वनियंत्रणेला परवानगी देण्यात आली होती.

यावेळी विसर्जन मिरवणुकीत गणरायांना निरोप देण्यासाठी कर्णकर्कश ध्वनियंत्रणा लावण्यात आली. यंदा १६० हून अधिक सार्वजनिक गणेशोत्सव मंडळांनी पारंपरिक वाद्यांऐवजी कर्णकर्कश ध्वनियंत्रणा लावली होती. पोलिसांनी मिरवणुकीत प्रत्यक्ष तपासणीनंतर अहवाल ध्वनिप्रदूषण मंडळाकडे पाठविण्यात आला होता. त्याचा अहवाल प्राप्त झाला आहे.

यानंतर पोलिस प्रशासनाकडून गेले दोन दिवस शहरातील नियम मोडणाऱ्या गणेशोत्सव मंडळांचे अध्यक्ष आणि ध्वनियंत्रणा मालकांवर कारवाई करण्यासंदर्भात नोटिसा देण्यात आल्या आहेत. ही मंडळे आणि ध्वनियंत्रणा मालकांवर लवकरच गुन्हे दाखल होतील, असे निर्देश पोलिस अधिकाऱ्यांनी दिले आहेत.