सांगली : सांगली शहरात (Sangli City) कोरोनाने (Coronavirus) पुन्हा शिरकाव केला आहे. विश्रामबाग परिसरातील एका दाम्पत्याला कोरोनाची लागण झाल्याचे आज स्पष्ट झाले. दोघांचीही तपासणी करण्यात आली असून, त्यांचे नमुने पुण्याला पाठवण्यात येणार आहेत.

दोघांचीही प्रकृती सामान्य असल्याचे सांगण्यात आले. सांगली शहरातील उस्मानाबाद परिसरात एका पुरुषास सर्दी-खोकल्याचा त्रास होता. त्यामुळे त्यांची कोरोना चाचणी करण्यात आली. त्यांच्यासोबतच त्यांच्या पत्नीचीही चाचणी करण्यात आली.

त्यांचे अहवाल आले. त्यामध्ये दोघेही कोविड पॉझिटिव्ह (Covid Positive) असल्याचे स्पष्ट झाले. दोघांनाही कोविडची लागण झाल्याचे समजतात महापालिकेचे आरोग्य यंत्रणा सतर्क झाली. महापालिकेचे वैद्यकीय अधिकारी डॉ. वैभव पाटील यांनी या रुग्णांची भेट घेतली. त्यांचे रिपोर्ट तपासले व त्यांची गेल्या महिन्याभरातील माहितीही घेतली. यातील पुरुष रुग्णाला सर्दी, खोकल्याचा त्रास असल्याने त्यांची कोरोनाची तपासणी करण्यात आली.

मात्र, त्यांच्या पत्नीस कसलाही त्रास नसतानाही त्यांचा अहवाल पॉझिटिव्ह आला आहे. घरात दोघेच राहतात. तरीही महापालिका आरोग्य विभागाने परिसरातील नागरिकांचाही आज सर्व्हे केला. यात इतर कोणाला याचा त्रास नसल्याचे दिसून आले आहे. या दाम्‍पत्याला कोविडचा नवा प्रकाराची लागण झाली आहे का? हे स्पष्ट झालेले नाही. त्यांचे नमुने तपासणीसाठी पुण्याला पाठवण्यात येणार आहेत. त्याचा अहवाल थोड्या दिवसांनी मिळेल. त्यानंतर हा कोणत्या प्रकारचा कोरोना आहे हे स्पष्ट होणार आहे.

घाबरू नका, काळजी घ्या

महापालिकेचे वैद्यकीय अधिकारी डॉ. पाटील यांनी नागरिकांना घाबरून न जाता काळजी घेण्याचे आवाहन केले आहे. तसेच कोरोना नियमांचे पालन करावे आणि सर्दी, खोकल्याचा त्रास असल्यास तपासणी करून घ्यावी, असे आवाहन केले आहे.